Suid-Kaap Kinderkoor hou werksessie
Besoekers aan die Eden Meander Lifestyle Centre is Saterdag begroet met die mooi klanke van koormusiek toe die bekende Suid-Kaap Kinderkoor sy maandelikse werksessie by die sentrum gehou het.
Dit was deel van hul voorbereidings vir komende konserte en optredes.
As deel van Saterdag se geleentheid is 'n sogenaamde flash mob ook gehou. Lede van die koor het op verskillende punte in die winkelsentrum gestaan en toe al singende na 'n sentrale punt gestap. Van die besoekers het gaan stilstaan en na afloop spontaan hande geklap.
Mimi Haasbroek, koorbestuurder, het gesê die werksessie gee ook geleentheid vir koorlede om oefening te kry om in die openbaar op te tree.
Volgens haar het 'n wonderlike geleentheid in die koorse skoot geval. Die George munisipaliteit is die tweeling stad van Tacoma in die deelstaat Washington.
Hulle het deur die George-munisipaliteit die Suid-Kaap Kinderkoor genooi om 'n toer na Tacoma in Mei/Junie 2020 te onderneem. Tydens die toer sal die SuidKaap Kinderkoor saam met die Tacomajeugkoor optree en by verskeie plekke sing. Onderhandelinge gaan voort.
Die munisipaliteit sal met die onderskeie skole praat sodat leerlinge nie akademies ontwrig word nie. As die toer wel realiseer sal die koor se konserttoer na Europa na 2022 skuif. Die konserttoer is beplan na die Wêreldkoorspele in België. As dit voortgaan sal besoeke ook gebring word aan Switserland, Italië en Oostenryk.
In die stadium is die plan dat die koor later vanjaar saam met PJ Powers op Knysna sal optree. Die datum sal later finaal bevestig word.
Op 5 April sal die koor optree by die NG Moedergemeente George en op 14 Mei by 'n Musiekmontage in George.
Volgens Haasbroek is daar sowat 100 koorlede en hul ouderdomme wissel tussen 9 en 16 jaar. Die deelnemers kom van verskeie plekke regoor die streek van Mosselbaai tot Plettenbergbaai en self van Ladismith. As gevolg van die geografiese uitgestrektheid kan die koor nie elke naweek saam oefen nie. Hulle oefen afsonderlik en het gewoonlik 'n gesamentlike werksessie elke maand. Die koor bestaan al sedert 1996.
Benewens Haasbroek (koorbestuurder) is Jan-Erik Swart die dirigent en Sunette Naude, die begeleidster. Daar is ook twee stemafrigters, Annette Strydom en Helianthe Pieters. Die logistieke bestuurder is Fred Pieters en hy word bygestaan deur Dirk Botha. Swart het gesê die koor bied 'n geleentheid aan lede om oorsee te kan optree en blootstelling te kry.