‘Moeës’ kry ‘n tweede asem
Beachweg in Pacaltsdorp was gisteroggend deur betogers geblokkeer. Verkeer is vir ure ontwrig en die polisie het skokgranate en rubberkoeëls gebruik om die oproeriges uiteen te jaag.
Betogers het vroeg gisteroggend die pad na Pacaltsdorp, Beachweg, met 'n ketting van mense geblokkeer. Onwettige grondbesetters van beide New Dawn Park (Moeggehuur) en Seaview (Moeggeploeg) het aan die betoging deelgeneem. Dié name van die areas waar grond onwettig beset word, dui op inwoners se frustrasie met die pas waarteen behuisingsprojekte in George plaasvind.
Hier en daar het motoriste Woensdagoggend daarin geslaag om 'n pad deur die skare in Beachweg te baan, maar die verkeersvloei is grotendeels tot stilstand gebring.
GO GEORGE-busdiens kon nie hierdie roetes ry nie. Inwoners wat kinders betyds by die skool moes kry vir eksamens het hul frustrasie geopper. Betogers het gister teen 10:00 terugbeweeg na die Pacaltsdorp polisiestasie. Die polisie se eenheid vir openbare orde (Pops) en beamptes van George-verkeer moes oproeriges beheer.
Van die betogers het klippe na die polisie en motoriste gegooi. Tydens die skermutseling is 'n bystander, wat te voet op pad was werk toe, deur 'n rubberkeël langs haar oog getref. Die slagoffer moes mediese behandeling na die voorval ontvang. Dié betoging gisteroggend volg kort nadat beamptes van die munisipale anti-grond besettings eenheid, met die hulp van Pops, onwettige plakkershutte Dinsdagoggend op 'n oop stuk grond in Bluegumstraat in Seaview, Pacaltsdorp, afgebreek het.
Volgens die groep van New Dawn Park is hulle gegrief nadat hulle 'n hofbevel vir hul uitsetting op 'n stuk grond langs die New Dawn Park Laerskool ontvang het, ondanks 'n onderneming van die Wes-Kaapse minister van menslike nedersettings, Bonginkosi Madikizela, dat hy die hofprosesse sal keer tot hy met die groep ontmoet het.
'Moeggeploeg' plat op die grond
Rubberkoeëls, skokgranate en traangas is tydens Dinsdag se voorval in Seaview ingespan. Die hutte is oor die afgelope twee weke onwettig deur agter plaasbewoners van die area opgerig. Inwoners het hierdie nuwe plakkerskamp ‘Moeggeploeg’ gedoop, omdat hulle meen hulle is moeg gewag vir huise. Sowat 18 plakkershutte was Dinsdagmiddag steeds staande terwyl ongeveer 20 hutte afgebreek is. Inwoners van Seaview, wat terloops in die area was, moes maar koes toe die traangas en rubberkoeëls in hulle rigting vlieg. 'n Groep omstanders wat van 'n redelike afstand (sowat 400 m) gestaan en kyk het hoe die munisipale beamptes die hutte afbreek, moes skielik hardloop toe rubberkoeëls in hul rigting trek. 'n George Herald-verslaggewer was onder hulle.
Volgens inligting is traangas in een van die plakkershutte wat reeds bewoon was, gegooi. 'n Gesin van vier, waaronder twee kleuters (2 en 3-jaar oud) het van die hut gevlug. Die kinders se ouers het hulle in 'n motor gelaai en weggejaag. Die name is bekend aan die George Herald, maar kontak met die ouers was nog nie moontlik nie.
In Hibiscusstraat het inwoners en grondbesetters saamgedrom. Inwoners het later motorbande in Rose- en Hibiscusstraat begin brand. Kort-kort is traangas en rubberkoeëls gebruik om die skare uiteen te jaag. Ma's met babas op die heup en kinders van alle ouderdomme het by huise ingehardloop. In een voorval is 'n ma, Suzanne Michaels, en haar baba in haar huis in Hibiscusstraat deur die traangas oorval. Michaels is nie 'n grondbesetter nie.
Verskeie omstanders en inwoners het hul skok oor die mildelike gebruik van ammunisie uitgespreek. Kommentaar van die polisie hieroor word afgewag.
Die EFF en onwettige grondbesetters van New Dawn Park het later by die toneel aangesluit en met grondbesetters in gesprek getree. Piet Malgas van die EFF en 'n inwoner van Seaview, het gesê hulle ondersteun die mense in hul tyd van nood. Van die mense het na die tyd weer begin om hutte te herbou.