George kyk na ander energiebronne
Die George-munisipaliteit ondersoek die moontlikheid om van alternatiewe kragbronne gebruik te maak om sy elektrisiteitsbehoeftes aan te vul. Dit is deur George-burgemeester, Melvin Naik, bevestig.
Vrae het die afgelope tyd ontstaan in welke mate George gebruik gaan maak van alternatiewe kragbronne gegewe die herinstelling van beurtkrag.
Dit het ook weer ter sprake gekom by die amptelike bekendstelling van 'n nuwe inisiatief tussen die George-munisipaliteit en Wesgro om beleggings na George te lok.
Naik het aan die George Herald gesê daar word gekyk na alternatiewe, gegewe beurtkrag wat tot kragonderbrekings lei.
Volgens Naik het hy onlangs die vergadering van die Premiersforum in Worcester bygewoon.
Daar het die aangeleentheid ter sprake gekom en dit is bespreek teen die agtergrond van 'n buitekans vir 'n algehele verdonkering (blackout). Daar is onder meer met Eskom gepraat.
Helen Zille, die Wes-Kaapse premier, se versoek aan munisipaliteite was dat hulle moet gesels met onafhanklike kragvoorsieners.
Zille het onderneem om dan op die nasionale regeringsfeer weer die aangeleentheid op te neem met Jeff Radebe, minister in die presidensie, om dit amptelik te maak dat ooreenkomste met sulke instansies gesluit kan word.
Naik het gesê George-munisipaliteit is voortdurend op die uitkyk na oplossings.
Een van die uitdagings in George is die baie mense wat na die gebied kom. Hulle maak hul tuis in veral informele gebiede waar daar geen elektrisiteit is nie. Dit lei baie keer tot protesaksies.
Om die gaping te oorbrug het die George- munisipaliteit verlede week kontak gemaak met 'n maatskappy wat betrokke is by behuising en 'n ander maatskappy wat betrokke is met sonkrag en sonpanele. Die maatskappye gaan nou 'n risikoanalise doen en 'n plan opstel om die gebruik van sonkrag tot uitvoering te bring.
Dr. Dennis Farrell, voorsitter van die George-sakekamer, het gesê die vestiging van alternatiewe energiebronne is baie belangrik.
"Dit verseker standvastigheid en dit beteken daar is dan betroubare energiebronne. Dit dra ook by tot die verbetering van die omgewing."
Volgens Farrel kan dit ook help om beleggers te lok. Dit is op twee vlakke. Dit is ten opsigte van betroubare elektrisiteitsvoorsiening en beleggers wat in die energiebedryf in George wil kom belê.
By die Garden Routedistriksmunisipaliteit se kantore in George word al meer as 'n jaar van sonkrag gebruik gemaak om die elektrisiteitsbehoefte aan te vul. Memory Booysen, burgemeester, het gesê dit help baie en lei tot besparings. Dit vereis wel tegniese vaardighede. Die moontlikheid word ondersoek om dit uit te brei na ander satellietkantore van die munisipaliteit.
Die George-lughawe maak ook reeds gebruik van sonpanele om sy elektrisiteitsbehoeftes aan te vul.
Die lughawe was die eerste in Afrika om in September 2015 oor te gaan na die gebruik van sonkrag.