Varkaanvallers gevonnis

Drie jong mans, waarvan twee minderjarig is, is Dinsdag 12 Maart in die George-hof vir dieremishandeling en veediefstal gevonnis. Hulle het op 25 Januarie skuldig gepleit en die hof het die pleit aanvaar.

Daniël Minnies en die twee minderjarige beskuldigdes (albei 16), is in 2017 in hegtenis geneem op aanklagte van dieremishandeling en diefstal ná hulle 'n man van Syferfontein se varke gesteel en met kapmesse bygedam het.

Volgens Tuinroete DBV-inspekteur, Henrico Peypers, het hulle op 19 Maart 2017 'n oproep oor die voorval van die varke se eienaar ontvang.

"Die varke was erg beseer en is na die DBV gebring vir chirurgiese behandeling. 'n Saak van dieremishandeling is deur ons en die eienaar geopen. Die eienaar het ook 'n klag van diefstal gelê. Daar was in daardie stadium geen verdagtes nie, maar deur goeie speurwerk van die veediefstaleenheid, kon die beskuldigdes vasgevat word," sê Peypers.

Minnies en sy medepligtiges is 'n boete van R6 000 of 12 maande tronkstraf, opgeskort vir vyf jaar, opgelê.