Tentkerk skuif ná interdik
Alida de Beer
Die Christ Dominion City-gemeente het die afgelope naweek vir die laaste keer 'n diens te Noordstraat 30 (erf 52), Pacaltsdorp gehou.
Ná die oggenddiens is die tent waarin kerk gehou is opgeslaan en het die gemeente opgepak om te skuif na 'n perseel wat glo in die George-industriële gebied geleë is.
Dit volg op 'n hofinterdik wat die Georgemunisipaliteit verkry het om die kerk te dwing om te trek. Dit is uitgereik in terme van die verontagsaming van die munisipale grondgebruikregulasies. Die grond is nie vir kerkdoeleindes gesoneer nie. Joel Togba, die kerkleier, het in April verlede jaar 'n munisipale kennisgewing geïgnoreer ingevolge waarvan hulle die perseel moes ontruim.
Togba se kerk het in laat 2017 sy intrek in Noordstraat geneem. Die munisipaliteit het die elektrisiteit na die erf afgesny, maar die kerk het 'n kragopwekker ingespan om sy bedrywighede te kan voortsit.
Die Van der Berg-familie van Pacaltsdorp, wat beweer dat hulle verwant is aan oorlede mnr. Jacobs in wie se naam die betrokke erf geregistreer is, het gesê die familie is verlig. "Ek glo hierdie kerk het nie 'n impak gemaak op die gemeenskap nie. Die feit dat hulle getrek het, is 'n bewys dat hulle van dag een af onwettig op die grond was," het Edmond van der Berg gesê.
Sy tannie en oom, Chrissie en William van der Berg (broer en suster), woon oorkant erf 52. Die Van der Bergs is besig met 'n proses om verwantskap met die ontslape eienaar van die erf te bewys sodat die boedel afgehandel en die erf aan hulle oorgedra kan word.
Togba het by meer as een geleentheid in die verlede te kenne gegee dat hy nie kommentaar wil lewer oor die situasie nie. Sy prokureur het teen saktyd nog nie op 'n versoek om kommentaar geantwoord nie.