Buurtwagte vra samewerking
Verskillende buurtwagte het vroeër die maand kragte saamgespan met Fidelity, ADT LVDS en Pangela Security vir 'n gesamentlike operasie om bewusmaking van misdaadbekamping te skep.
Die bymekaarkompunt was op die hoek van Swawel- en Korhaanstraat, Conville waar kol. Ronald Swart van die Convillepolisie die buurtwagte van Proteapark en Le Vallia toegespreek het. Daarna is die gesamentlike operasie in die strate van Conville, Lawaaikamp, Borcherds, Rosemoor en Proteapark voortgesit.
In Rosemoor het konst. Daniël Esau beslag gelê op nege Mandrax-tablette en 'n vleiskapmes. Niemand is in hegtenis geneem nie. 'n Verdagte na wie die polisie gesoek het, is ook in Rosemoor deur konst. Riaan Tromp en sers. David Claassen van die Conville-misdaadvoorkomingseenheid gearresteer. Konstabels Allister Avontuur en Lornene Tromp was ook deel van die patrollie.
In Borcherds is 'n man met 'n kapmes wat alkant flymskerp gemaak is, gearresteer.
"Ons doen 'n beroep op die gemeenskap om hul samewerking te gee en nie die misdaadbekampingsinisiatief teen te staan nie," sê Rudy Lewis, voorsitter van die Conville-buurtwag. "Die kerkleiers word ook uitgenooi om ondersteuning te gee sowel as die besigheidsmanne in Mandelaboulevard. Dwelm- en alkoholmisbruik is die groot oorsaak van misdaad waaronder inbraak, diefstal en huishoudelike geweld. Ons jeug wat die toekomstige leiers is, word gevange gehou en teruggehou as gevolg van verslawing en bendebetrokkenheid. Laat ons hande vat. Genoeg is genoeg. Ons vat ons strate en eiendomme terug en skep 'n beter en veiliger gemeenskap vir almal."
Vir meer inligting oor die buurtwag en oor hoe om betrokke te raak, bel Lewis by
061 977 6098.