Ongelukke op paaie oral die naweek
Die afgelope langnaweek het George weer sy deel van motorongelukke ervaar. Volgens George-verkeershoof, Donovan Saptoe, was die paaie in en om George relatief besig met verskeie motorongelukke wat gerapporteer is.
"Gedurende die naweek het George verkeersafdeling saam met die Wes-Kaapse provinsiale verkeersafdeling en lede van die polisie aan geïntegreerde padblokkades deelgeneem," sê Saptoe.
Hy sê een persoon is vir dronkbestuur in hegtenis geneem en 152 boetes is uitgereik. Boetes is uitgereik aan onder meer motoriste wat sonder lisensies bestuur het, ongelisensieerde voertuie, voertuie wat oorlaai was en motoriste wat versuim het om by stopstrate of rooi verkeersligte te stop.
Ongelukke oor die naweek
Vrydagmiddag het die bestuurder van 'n wit Mitsubishi-bakkie wat houtstompe met 'n sleepwa vervoer het, beheer oor sy voertuig verloor waarna die voertuig op sy dak beland het. Die voorval het kort voor 15:00 op die N2 net na die Thembalethubrug plaasgevind. Nie die bestuurder of sy passasier het ernstige beserings opgedoen nie.
In 'n afsonderlike voorval was drie voertuie in 'n botsing aan die agterkant van die departement van korrektiewe dienste in Hoopstraat betrokke. Volgens getuies het 'n silwerkleurige Opel-motor in die pad stilgestaan toe 'n wit Hyundai-motor die Opel van agter getref het. Die Hyundai het na bewering getol en 'n Isuzu-bakkie, wat agter hom gery het, getref. Niemand is ernstig beseer of gehospitaliseer nie. Geen verdere inligting rondom die ongeluk was teen druktyd bekend nie.
Daar was Saterdagaand ‘n ongeluk op die Dellvillepark / Rosedale-kruising waarby 'n wit VW Golf en 'n silwerkleurige Hyundai-bussie betrokke was. Die Golf het na bewering van die toneel af weggejaag. Volgens Pacaltsdorp-polisie se kommunikasiebeampte, sers. Shadelle Fisher, is die ongeluk nie by hulle aangemeld nie. "Niks is by Pacaltsdorp-polisie aangemeld nie. Volgens ons boeke is daar nie so 'n ongeluk nie," het sy gesê.
Met die George Herald se aankoms op die toneel was polisiebeamptes van dié stasie wel teenwoordig asook verkeersbeamptes. 'n Polisiebakkie het die toneel verlaat en na 'n winkel in Dellvillepark gejaag waar dit by 'n wit Golf gestop het, wat gelyk het asof dit in 'n ongeluk was.
Op Sondag 24 Maart omstreeks 09:15 het twee voertuie mekaar by die verkeerslig by die Garden Route Mall getref.
Volgens Conville-polisie se stasiebevelvoerder, kol. AB Kriga, word daar beweer dat die verkeerslig vir albei voertuie groen was toe 'n Toyota Corolla en 'n Nissanbakkie mekaar getref het.
"Een bestuurder beweer dat die pyl om regs te draai na die ingang van die winkelsentrum geflits het toe hy gedraai het. Die ander voertuig wou reguit ry en hulle het mekaar getref," sê hy.
Volgens 'n getuie het die Nissan-bakkie met twee insittendes, die passasierskant van 'n Toyota Corolla getref toe dié na die GR Mall wou afdraai.
Die vier insittendes in die Corolla en albei in die Nissan is deur paramedici na die hospitaal geneem waar hulle vir ligte tot matige beserings behandel is.
In 'n tweede voorval het 'n voertuig met vyf insittendes, drie mans en twee vroue, op sy dak in 'n sloot langs die N2 naby die Glentana-afrit beland. Die bestuurder het klaarblyklik beheer oor die voertuig verloor waarna die voertuig die pad verlaat het.
Die beseerdes het ligte en matige beserings opgedoen. Al vyf pasiënte is deur ER24paramedici na die George-hospitaal geneem.