Brande-belasting doodgebore
Die land se probleem is nie die beskikbaarheid van geld nie. Dit is hoe die geld bestuur en bestee word.
So het Anton Bredell, Wes-Kaapse minister van plaaslike regering en DA-voorsitter in die provinsie, by navraag gesê.
Hy het kommentaar gelewer na aanleiding van 'n openbare herrie wat losgebars het oor 'n voorstel van Memory Booysen, burgemeester van die Garden Routedistriksmunisipaliteit, dat 'n bykomende brande-belasting ingestel moet word.
Booysen het die voorstel verlede week gemaak tydens 'n Brandewerksessie. Hy het onder meer voorgestel dat 'n aparte heffing ingestel word om die kostes van brande te dek.
Die geld kan dan gebruik word vir die kostes van brandbestryding en skade aan eiendom. Die George Herald het verlede week eerste daaroor berig en Bredell het daarna met Booysen kontak gemaak.
Volgens Bredell het Booysen dit nie vooraf moet hom uitgeklaar nie en daar is nie sprake dat so-iets ingestel sal word nie.
"Die Wes-Kaapse regering en die DA is daarteen gekant."
Bredell het benadruk daar is nie 'n tekort aan fondse nie. "Die debatte moet gaan oor die bestuur en prioritisering van fondse.
“Ons is reeds oorbelas as 'n nasie en korrupsie is die euwel wat uitgewis moet word.
"Ons bestuur die beste rampbestuursentrums op die Afrikakontinent. Ons prioritiseer dit jaar na jaar en belê daarin. Die land het nie 'n tekort aan geld nie. Dit is wanbesteding en korrupsie wat ons op ons knieë dwing.
"Die land sit met te veel Eskoms. Ons belê nie in infrastruktuur nie en hou dit nie in stand nie.
“Deel van die debat moet eerder wees wat is die koste van ons regering wat tans bestaan uit nasionaal, provinsiaal en die A-,B- en C-munisipaliteite. Waarvoor ons moet baklei is 'n debat oor wat is 'n bekostigbare politieke stelsel vir ons land."
Booysen het Dinsdag gesê hy het die voorstel gemaak om 'n debat aan die gang te kry vir 'n oplossing.
"Dis duidelik my voorstel is nie aanvaarbaar nie. Dit is nie 'n raadsbesluit en die DA se standpunt nie. Ek beskou my voorstel as doodgebore."
Een van die mense wat tydens die konferensie kritiek teen Booysen se voorstel uitgespreek het is dr. Jaap Steenkamp.
Steenkamp, bekende inwoner van George en hoof- uitvoerende beampte van die SA Forestry Contractors Association, het aan die George Herald gesê hy staan by sy standpunt. "Dis onaanvaarbaar. Instansies soos CapeNature, SANParks en die departement van landbou, bosbou en visserye moet hul verantwoordelikhede nakom."
Cobus Meiring, hoof van die sekretariaat van die Southern Cape Landowners Initiative, het gesê daar is nooit genoeg geld nie. Hy kan nie sien hoe so 'n "brandebelasting" toegepas kan word nie.
Daar is baie mense wat hulle deel doen en ander nie.
Herprioritisering moet gedoen word van die nasionale departemente se toekenning van geld vir byvoorbeeld hoë risiko gebiede. Dit is waar byvoorbeeld indringerplante voorkom wat 'n groot rol speel in die brande.