Planne om meer besoekers na museum te lok en voortbestaan te verseker
Pogings word aangewend om die voortbestaan van die George-museum te verseker. Ofskoon dit in die stadium nie direk in die spervuur is nie, is daar kommer oor die toekoms. Die organisasie, Vriende van die George Museum, is by die jongste poging betrokke.
Abrie de Swardt, voorsitter van die organisasie, het aan die George Herald gesê vir die museum om lewensvatbaar te bly moet 12 000 mense per jaar die museum besoek.
Op die oomblik word dit nog gehandhaaf, maar daar is kommer oor die toekoms. Die museum ontvang geld van die staat. Tans word geen toegangsgeld gehef nie, maar besoekers is welkom om donasies te maak.
"Ons is bekommerd oor die voortbestaan van museums landswyd en die Georgemuseum. Museums is reeds onder druk as gevolg van fondse en ons wil sien dat meer mense museums besoek.
Geen land in die wêreld kan bekostig dat sy geskiedenis verlore gaan nie. Museums is nie net plekke waar besoekers na uitstallings kan kyk nie. Dis ook plekke waar mense navorsing doen."
Volgens De Swardt moet gemeenskappe betrokke wees by museums om volhoubaar te wees. Daar word gepoog om meer besoekers na die museum te lok en dit kan help om die voortbestaan te verseker.
As deel van die organisasie se planne word verskeie instansies betrek om byvoorbeeld hul vergaderings en uitstallings by die museum te hou. Dit sluit in die Genealogiese Genootskap van Suid-Afrika se Suid-Kaapse tak, die Suid-Kaap visuele kunstenaars en die George-kameraklub. "Ons wil George die kulturele samewerkingspunt van mense in George en die Suid-Kaap maak."
Die plan is om later vanjaar 'n simposium by die museum te hou waarby al die museums in die Suid-Kaap betrokke sal wees. "Ons wil dit doen om groter samewerking tussen die verskillende museums te verseker."
Die organisasie kyk ook na hoe skole betrek kan word.
Die Vriende van die George Museum en die Genealogiese Genootskap van SuidAfrika se Suid-Kaapse tak is betrokke by 'n skoolprojek. Sowat 90 gr.3-leerlinge van die George Voorbereidingskool is betrokke en hulle doen navorsing oor hul eie families soos byvoorbeeld wie is hulle oupas en oumas.
So word gehoop om hul belangstelling te prikkel sodat hulle self 'n draai by 'n museum sal wil maak.