Onwettige betogings befoeter begroting
Na aanleiding van die mees onlangse betogings in New Dawn Park en Seaview, sowel as verskeie protesoptogte in die dorp, het die direkteur van behuising, Charles Lubbe, en die hoof van wetstoepassing, Richard von Willigh, by navraag kommentaar oor die situasie gelewer.
Lubbe het gesê daar is ‘n goedgekeurde behuisingspyplyn waar projekte in terme van prioriteit beplan word en finansiering dienooreenkomstig bekom word.
"Die voorsiening van behuisingsgeleenthede word gekoppel aan die waglys, die beskikbaarheid van grond en befondsing vir geïntegreerde behuisingsontwikkelings," het hy gesê. "Onwettige besettings skep uitdagings vir die begroting aangesien daar nie beplan word vir sodanige onvoorsiene gebeurlikhede nie. Dit plaas dan geweldige druk op die munisipaliteit om fondse vanaf provinsie te bekom, om onmiddellik basiese dienste te voorsien."
Von Willigh het gesê wettige optogte word hanteer ingevolge die bepalings van die Regulasies van die Versamelingswet. Met verwysing na die onlangse betoging (14 Maart) in New Dawn Park, Proteastraat, het hy gesê alhoewel die munisipaliteit nie 'n aansoek vir die betrokke optog ontvang het nie, is alle veiligheidsmaatreëls ingestel om moontlike risiko's en negatiewe impak op spitsverkeer te verminder. "Weens klipgooiery, die belemmering van voertuie om vrylik te beweeg, dreigemente en intimidasie was dit noodsaaklik om aksie teen die betogers te neem. Daar sal nie enige noodmiddels of optredes gebruik word in enige gebied, tensy daar nie 'n geldige rede vir wetstoepassing is nie."
Von Willigh noem die New Dawn Park-voorval is 'n geïsoleerde voorval. "In George bestuur die sameroepers optogte in die algemeen baie goed en daar is minimale gevalle waar aksie geneem moet word."(Lees nog behuisingsartikels op bl.14)