Só doen jy aansoek vir behuising
In die lig van onlangse betogings en protesaksies, wat meesal kwessies oor behuising insluit, is dit dalk van waarde om aandag te gee aan die proses wat plaasvind wanneer persone aansoek doen vir 'n behuisingsgeleentheid.
George-munisipaliteit het by navraag die volgende inligting gestuur, wat die proses verduidelik wanneer 'n persoon aansoek doen om in aanmerking te kom vir 'n gesubsidieerde huis.
Wanneer ‘n aansoeker die behuisingskantore besoek, word die aansoek onmiddellik in hul teenwoordigheid geprosesseer. Die databasis gee vir die aansoeker ‘n unieke verwysingsnommer, wat behou word totdat die aansoeker ‘n behuisingsgeleentheid ontvang. Die aansoeker ontvang ‘n kaartjie waarop die unieke verwysingsnommer aangetoon word as ‘n bewys dat sy/haar aansoek op die databasis gelaai is.
Enige skriftelike dokumentasie van ‘n aansoeker, byvoorbeeld afskrifte van identiteitsdokumente, geboortesertifikate of wysigings van inligting word geskandeer en onder die aansoeker se identiteitsnommer op die elektroniese databasis gestoor sodat dit maklik verkrygbaar is.
Persone wat op die George-munisipaliteit se behuisingsbehoefte-databasis is kan nou met behulp van ‘n skakel op die internet kyk of hulle behuisingsaansoek nog aktief is.
Die Wes-Kaapse departement van menslike nedersettings het die aanlyn publieke soekfasilitieit beskikbaar gestel om mense te help om hulle status op die behuisingswaglys na te gaan.
'n Aansoeker kan net 'n IDnommer intik en as die persoon op die databasis is sal ‘n letter die status soos volg aandui:
W= waiting (wagtend), wat beteken dat die aansoek nog aktief is en geen onmiddellike aksie benodig nie.
C= cancelled (gekanselleer), wat beteken dat die aansoek gekanselleer is. Besoek die bestaande behuisingskantoor om uit te vind waarom die aansoek gekanselleer is.
A = Assisted (gehelp), wat beteken dat die persoon reeds voordeel uit ‘n behuisingsubsidie getrek het. Besoek die bestaande behuisingskantoor indien jy nie met hierdie status saamstem nie.
Indien iemand 'n aansoek vir behuising saam met ‘n ander persoon gedoen het, sal die naam van daardie persoon aangedui wees. Indien 'n betrokke individu nie meer saam met die persoon is waarmee aansoek gedoen is nie, moet die bestaande behuisingskantoor besoek word om die inligting reg te maak.
Die webtuiste-skakel is www. george.gov.za/human-settlements, of klik op die skakel http://wchddbv2. westerncape.gov.za/Search/ SearchApplication.aspx.
Die bestaande behuisingskantoor is agter die George-munisipaliteit se hoofgebou geleë (langs die kliniek, tussen Victoria en Progress-strate). Rig navrae aan 044 801 9113 of
044 801 9078.
Intern kan persone die volgende skakel besoek: http://190.100.100.91/ human-settlements.
Dit bly elke aansoeker se verantwoordelikheid om te verseker dat hy/sy gereeld hul besonderhede opdateer, veral wanneer die kontakbesonderhede verander het.