PDSA sal jou diere help
Dr. Shiley Smith van die PBSA in Conville. Hier is Zuna Mouton, dr. Natasha Clark en Elna Hardnick met Muffin die hond.
Die People’s Dispensary for Sick Animals (PDSA) in Conville werk in minderbevoorregte gemeenskappe waar mense nie altyd vir die behandeling van hul diere kan betaal nie. Die PDSA is by die departement sosiale ontwikkeling as ‘n nieregeringsorganisasie geregistreer.
Dr. Shirley Smith van PDSA sê hulle probeer om nie diere uit te sit nie. “Ek sal liewer mense inlig oor hoe om hul diere gesond te hou, en as hulle nie kan betaal nie, help ons hulle.”
Smith werk al meer as 20 jaar vir die welsynsorganisasie en glo die werk wat hulle doen maak ‘n verskil. Sy voel sy sal liewer ‘n hond of kat se been opereer, sien hoe die dier herstel en dan weer by sy familie terugbesorg. Volgens haar is dit baie keer kinders wat hul troeteldiere vir behandeling of inspuitings bring. Sy vertel hulle het ‘n veldtog gehad waar hulle gratis diere sou steriliseer en vir brandsiek behandel, die eienaars moes die dier net tot daar bring. “Weet jy nie een persoon het opgedaag nie. Ons kry oproepe van mense wat sê hulle wil hul diere laat steriliseer, maar ons moet tot daar kom.”
Die PDSA het ‘n mobiele hospitaal wat na die gemeenskappe gaan waar diere vooraf geïdentifiseer is en hulle dan gaan behandel. Op die oomblik vra hulle R50 vir behandeling, maar sal ook enige donasie aanvaar indien die persoon regtig nie geld het nie, so sê Moira Gibbs die bestuurder van die PDSA.
Gibbs sê hulle maak grootliks staat op donasies, maar selfs hul gereelde donateurs kan nie meer so gereeld geld skenk nie.
Sy sê hulle sal pensionarisse, Sassamense en selfs families met ‘n stywe begroting help.
Mel Weelson het die George Herald genader oor die goeie werk wat die organisasie doen, want sy voel hulle kry nie genoeg aandag. Weelson het dit op haarself geneem om in ‘n gemeenskap soos Conville te werk. “Ek gaan na mense toe, kyk na hul diere en identifiseer die diere wat mediese hulp nodig het. Ek vat baie keer self daardie dier na die PDSA vir behandeling.” Sy gee so baie om vir diere dat sy hulle saam huis toe vat en soms aanneem. Sy is ook bekend as tannie Hondjie, en sal haar laaste gee vir die welsyn van diere.
As jy van jou tyd wil gee of ‘n donasie kan jy hulle per e-pos kontak by pdsarj@mweb.co.za