Gedenkboek help tolhuis
Die Vriende van die Tolhuis bied op Donderdag 4 April 'n boekvrystelling aan a s' n geldinsameling s projek vir die restourasie van die tolhuis.
Jeanette van Rensburg se boek, Die Boerevrou Gedenkboek 2019, word met 'n sop- en sjerrie-aand by die George-museum bekendgestel.
'n Gedeelte van die boekverkope by die bekendstelling word aan die restourasieprojek geskenk.
Die geleentheid begin om 18:30. Toegang is R70. Voornemende gaste moet bespreek ter wille van spyseniering.
Bespreek by gerdastols@telkomsa. net of skakel 044 874 6277.
Die Boerevrou was die eerste Afrikaanse vrouetydskrif. Dit is van Maart 1919 tot Desember 1931 in Pretoria onder die redakteurskap van die eienares, Mabel Malherbe, uitgegee. Die tydskrif was baie gewild onder haar lesers en is dwarsoor Suid-Afrika gelees, en is selfs ook ver buite die land se grense versprei. Vandag kan Die Boerevrou bestempel word as ‘n ryk skat van inligting oor die Afrikanervrou en haar leefwyse in die vroeë 20ste eeu. Van Rensburg het met ‘n doktorale studie in kultuurgeskiedenis bevind dat dit verteenwoordigend was van die historiese lesers en ‘n beduidende groep Afrikaanse vroue se lewensuitkyk en daaglikse lief en leed weerspieël het. Haar boek is ‘n geskiedenisboek wat nie net die eerste Afrikaanse vrouetydskrif gedenk nie, maar ook die ontwikkeling van die vrouetydskrif wese in die algemeen. Dit vertel vandag, ná 100 jaar, die aangrypende verhaal van hoe die vroue van ‘n volk opgestaan het na ‘n verpletterende oorlog en, deur ‘n tydskrif gewy aan hul belange in hul eie taal, in aanraking met die buitewêreld gebring is.