Wat die hart van vol is ...
Die tema van die Outeniqua Dames Aktueel se laaste vergadering was ‘Wat die hart van vol is loop die mond van oor.’
Natania van Heerden, aktrise wat bekend is vir haar rolle in Villa Rosa, Spoorloos en Sara se Geheim, het die lede weer daarop gewys hoe mense maskers dra, soos wat sy vir 22 jaar lank gedoen het, wat mense beperk in die uitleef van hul diepste waardes. Dit veroorsaak frustrasie wat mense na selfhelpboeke en Dr. Phil laat gryp. Sy het haar gehoor ‘n interessante vraelys laat invul en ontleed om dit toe te lig. Sy het afgesluit deur 'n sielvolle voorlesing van enkele gedigte.
Anton Treurnicht, wat nou op George woon, sê hy is ‘n akteur wat nie sy woorde kan onthou nie, ‘n skrywer wat nie kan spel nie en ‘n radio-omroeper wat nie sy sinne kan voltooi nie. Hy het ten spyte daarvan in films gespeel, 10 vervolgverhale vir
RSG geskryf, in meer as 40 internasionale advertensies verskyn asook in TV-reekse soos Vloeksteen en Boland Moorde, en is medeskrywer van Die Byl. Hy was omroeper by verskeie radiostasies.
Beide akteurs het die vroue aangemoedig om deur die glasplafon bokant hul kop te breek en hul ware self met liefde en passie uit te leef.
Ilze Tulleken van Duende Drama het ook ‘n gevoelvolle dramastuk gelewer.
Vir meer inligting oor Dames Aktueel, kontak Magdaleen Smook by 044 873 6568 / 074 977 1986 of Louie Meyer by 044 874 6523 / 084 525 2130.