Geen skokke in Premierliga
Die eerste ronde rugbywedstryde in die SWD Premierliga, wat verlede Saterdag afgeskop het, het nie juis skokke opgelewer nie met verlede jaar se topspanne wat almal gemaklik gewen het.
George, wat vanjaar saam met die Jaguars van Plettenbergbaai die nuwelingspanne in dié liga is, het met die afskop sy stem dik gemaak en Silver Stars met 69-18 afgestof (volledige berig op bl. 42). As hulle op dié trant kan aangaan, gaan George nog vir 'n paar groot skokke sorg.
Die klub het heelparty aanwinste bygekry en hy kon gemaklik drie spanne in die veld stoot.
Jaguars het 24-50 teen Evergreens vasgeval (berig en foto's op bl. 46), maar hy is geensins oordonder nie. Trouens, die Plett-besoekers het in die eerste helfte verras met hul aanvallende spel en Evergreens se verdediging goed beproef. Hul voorspelers het ook glad nie vir hul meer gevreesde teenstanders teruggedeins nie.
Maar in die tweede helfte het Evergreens gewys waarom hy al die Premierliga vantevore gewen het en met puik samespel tussen sy voor- en agterspelers beheer geneem.
In 'n klipharde wedstryd het Mosselbaai se Premierligaspan, Barbarians, op sy tuisveld, D'Almaida, sy seisoen op 'n hoë noot afgeskop deur Heidelberg met 20-13 te klop.
Barbarians se B-span het Heidelberg met 31-10 geklop, terwyl die Mosselbaaiers se C-span Heidelberg met 26-5 kaf gedraf het.
Soos Barbarians het Groot-Brak ook Mosselbaai se naam hoog gehou en Blanco in Groot-Brakrivier met 13-11 gewen. GrootBrak se B-span het met 17-5 as wenners van die veld gestap, terwyl hul C-span met 31-5 met Blanco afgereken het.
In George het Maori's hul rieme styf geloop teen Bridgton van Oudtshoorn met 35-17.
Bridgton se B-span het met 21-15 gewen, maar sy C-span het met 20-12 teen Maori's verloor het.