Setel glo nie net vir PBI nie
"As die betrokkenes so sterk voel, hoekom volg hulle nie die normale kanale soos om byvoorbeeld die Onafhanklike Verkiesingskommissie (OVK) te nader nie." So het Virgill Gericke, leier van die PBI, gereageer op die nuutste relletjie wat in die kuberruim woed waarby hy weer ingesleep is.
Gericke word daarvan beskuldig dat hy nie sy kant van 'n ooreenkoms nagekom het nie. Dit dateer reeds terug tot kort na die munisipale verkiesing in 2016. Na bewering het die kleiner politieke partye in die George-stadsraad toe ooreengekom dat hulle een van die ses raadslede na die destydse Edendistriksmunisipaliteit kon stuur. Die DA het drie gestuur en die ANC twee. Na bewering sou die setel dan op 'n jaar tot jaar basis tussen die kleiner partye roteer.
Dit is onlangs weer op 'n plaaslike Facebook-blad, Lokasie Staan Saam (LSS), geopper. Brendon Adams, eienaar van LSS, het by navraag bevestig dat dit ter sprake gekom het op die blad. Volgens hom het hy dit toegelaat omdat dit in openbare belang is.
Abel Kiwit, voormalige AIC-raadslid, wat destyds betrokke was by die aangeleentheid, het aan die George Herald gesê hy het destyds voorgestel dat die kleiner partye hul stemme saamvoeg. Die setel sou dan roteer. Gericke het eerste die setel opgeneem en aanvanklik het dit goed gegaan.
Die rotasie het egter nooit plaasgevind nie. "Die grondbeginsels hoe die setel bestuur moet word, is nooit nagekom nie. Dit is nie die PBI se setel nie."
Hy het kontak gehad met die OVK en hy is meegedeel dat hulle dit self moet oplos.
Volgens Kiwit het sy party hom opdrag gegee om die aangeleentheid uit te sorteer. Hy is van voorneme om 'n vergadering met die kleiner partye te hou oor die aangeleentheid.
Wilbur Harris van Icosa het gesê die kleiner partye het destyds saamgestem sodat die mag van die groter partye gekeer kon word. Die kleiner partye het die AIC se voorstel gesteun met die veronderstelling dat die setel roteer.
Johan du Toit van die ACDP het ook bevestig dat die kleiner partye destyds ooreengekom het dat daar 'n rotasiestelsel sou wees. Die ACDP het egter onttrek omdat die party gevoel het 'n sinvolle bydrae sou nie in 'n jaar gelewer kon word nie.
Gericke het gesê daar was geen vergadering waar so 'n besluit geneem is nie. "As die betrokkenes so sterk voel, hoekom neem hulle nie stappe nie?" wou hy weet. Hy het die bewerings as onsin beskryf.
Hy beskou dit as 'n aanslag wat op hom persoonlik gerig is kort voor die verkiesing.