Busse nou verbied om by skool te parkeer
Franken VGK Primêr se toekoms hang in die lug na die kontrak tussen die VGK op Herold en die Wes-Kaapse onderwysdepartement (WKOD) nog nie hernu is nie. En om dinge erger te maak het die skoolhoof en skoolbeheerliggaam onlangs 'n skrywe van die eienaar van Herold Meander, Theo Adams, se prokureur ontvang. Die prokureur verteenwoordig ook ds. Elias en die kerk.
Johannes Jumat, regsverteenwoordiger van Adams sê sy kliënt rig niks nuwe vrae nie. In die skrywe word melding gemaak van die busse wat op privaat eiendom parkeer, 'n kragkabel wat bo-oor sy perseel loop en 'n muur wat gedeeltelik op sy erf gebou is.
Jumat sê dit is alles ou kwessies wat nog geen aandag geniet het nie. Hy sê sy kliënt het wel die skool ingelig van sy planne vir die stuk grond waar die busse geparkeer het, en het alternatiewe veilige parkering voorgestel. "Daar is geen huurooreenkoms vir die busse nie."
Jumat sê ook in 'n persverklaring wat vroeër vanjaar aan die George Herald gestuur is dat die kontrak tussen die WKOD en die kerk nog nie hernu is nie omdat die huur wat aangebied word, glo nie die risiko's, dienste en onderhoud regverdig nie. Moses Carolus, die skoolhoof sê in die skrywe word skoolbusse verhoed om vanaf 1 April op Herold Meander se privaat eiendom te parkeer. "Dit was eerstens ons kommer want soos voorheen in die media gesê is, is dit gevaarlik vir die kinders om oor die pad te loop."
Carolus sê hulle is uit die veld geslaan, want in 'n gemeenskapsvergadering vroeër die jaar het Adams gesê die busse kan daar parkeer. "Hy het selfs houtpale verwyder wat daar opgesit was." Hy is ook nie bewus van enige voorstelle vir alternatiewe parkering nie. Die skool se vrees is dat Adams die skoolgeboue, wat aan die kerk behoort, wil koop om ontslae te raak van die probleme. Die hoof sê hulle wil graag die skool op Herold behou, juis omdat al die ander skole in die omtrek gesluit het.
Bronagh Hammond, 'n woordvoerder vir die WKOD, sê hulle is bewus van die brief aan die hoof en beheerliggaam. Sy sê die departement is steeds besig om met die kerk te onderhandel. "Ons probeer ook alternatiewe reëlings tref waar die busse moet staan."