Minister vra naamlys
Die Wes-Kaapse minister van menslike nedersettings, Bonginkosi Madikizela, wil graag weet presies wie die mense is wat tans in die onwettige plakkerskamp Moeggehuur, langs New Dawn Park Primêr woon. Madikizela het Maandagmiddag tydens 'n opvolgbesoek met die bestuurslede van Moeggehuur in die George-raadsaal vergader.
"Afhangende van die profiel van die mense wat daar woon, dink ek ons behoort 'n oplossing te vind," het hy gesê. Hy het Moeggehuur se bestuurslede herinner dat hy wag vir 'n lys van die grondbesetters wat tans op die grond woon, sodat hy 'n profiel van elkeen kan bou. "Ek het nodig om te weet wie daar woon," het hy gesê.
Madikizela het gesê alhoewel hy nie grondbesetting goedpraat nie, is daar 'n wesenlike verskil tussen 'n grondbesetter wat reeds 'n huis ontvang het, en op 'n stadium verkoop het, en diegene wat etlike jare wag om gehelp te word. Hy het benadruk dat hy simpatie het vir diegene wat sê hulle weet wat hulle gedoen het is verkeerd, maar hulle wag al vir 15 tot 20 jaar vir 'n huis. "Ek luister graag na hierdie tipe gevalle," het hy gesê.
Madikizela het gemaan dat plakkershutte wat nie bewoon word nie platgeslaan sal word, en dat geen nuwe grondbesetters op die grond mag plak nie.
Die bestuurslede het hom daarop gewys dat hy nie tydens sy vorige besoek vir 'n lys gevra het nie, maar dat hulle een kan verskaf. Volgens die leier van die groep, Theresa Fortuin, is van die plakkers sedert 1994 op die behuisingswaglys. Die munisipale direkteur van behuising, Charles Lubbe, het
bevestig daar is altesaam 65 strukture by Moeggehuur opgerig.
Madikizela het benadruk dat die grond waarop die plakkers woon nie aan hom behoort nie, maar aan die departement van onderwys. Volgens Madikizela het die departement aangedui dat hulle voortgaan met die hofproses om die grondbesetters te verwyder. Die saak word op 29 Augustus in die Kaapse hooggeregshof geargumenteer.
Die grondbesetters het intussen toegang tot water bekom, met twee krane wat op munisipale grond, op die sypaadjie, beskikbaar gestel is. Madikizela het onderneem om toegang tot toilette te ondersoek en hulle in kennis te stel.