Brandbestryders bedank en vereer
Brandbestryders en belange-organisasies is verlede Donderdag tydens 'n luisterryke geleentheid in die George-stadsaal bedank vir hul rol om die brande wat in Oktober/ November 2018 gewoed het, onder beheer te bring. Die eerste brand in die George-gebied het op 24 Oktober in Herold uitgebreek.
Altesaam 12 brande het vir bykans 'n maand gewoed en meer as 90 000 hektaar plantegroei is in George, Hessequa, Mosselbaai, Knysna en Bitou verwoes. In die tyd van die brande het nege mense hul lewens verloor.
Tydens die geleentheid is sertifikate uit erkenning aan verskeie instansies gegee. Onder hulle was Working on Fire, die DBV, die Wes-Kaapse provinsiale verkeersdepartement, Acsa, die Rotariërs en die Garden Route-distriksmunisipaliteit se rampbestuurafdeling. Kerse is ook aangesteek en 'n oomblik van stilte is gehandhaaf ter nagedagtenis aan mense wat gesterf het.
Die dankbetuigings-geleentheid sou vroeër gehou gewees het, maar is uitgestel.
Na die geleentheid is 'n reusebanier voor die munisipaliteit onthul uit erkenning vir die rol wat die Here in die tyd gespeel het.
Melvin Naik, George-burgemeester, het gesê mense onthou steeds die brande. Dit was 'n toetstydperk vir mense se geloof.
In die tyd is uitstaande toewyding van brandbestryders en verskeie ander instansies gesien wat betrokke was in die bekamping van die brande. "Ons het brandbestryders gesien wat nie teruggestaan het toe hulle moeg geword het. Hulle het deurgedruk tot die brande onder bedwang was. Die uitdagings waarmee hulle te doen gekry het, het hulle verander. Brandbestryders en al die ander wat betrokke was, het hul lewens op die spel geplaas om ander mense te beskerm. In die tyd het mense oor kleur en kulturele grense heen saamgestaan."
Volgens Naik het die belangrikheid om in ‘n rampbestuursentrum te belê vir die George-munisipaliteit in die tyd duidelik na vore gekom.
Memory Booysen, burgemeester van die Garden Route-distriksmunisipaliteit, het gesê niemand sal die Knysna- en Bitoubrande in 2017 vergeet nie. Hy het sy dank betuig aan almal wat destyds en weer verlede jaar gehelp het. In 2017 was daar meer as 1 000 brandbestryders van oor SuidAfrika in die gebied. Hy het verlede jaar se brande as van die grootste in Suid-Afrika se geskiedenis beskryf.
Booysen het vertel van die groot impak wat die brande op hom persoonlik gehad het. As hy soms rook sien, dan bel hy dadelik 'n burgemeester van 'n munisipaliteit. In die meeste gevalle het dit dan al reeds aandag gekry. Booysen het ook verwys na die groot skade aan infrastruktuur. Daar was egter ook onvoorsiene gevolge soos die verlies van werksgeleenthede. Daar is instansies in die gebied wat vernietig is en nie meer bedryf kan word nie.
Na die geleentheid het Booysen aan die George Herald gesê die ondersoek na die oorsaak van die brande is nog aan die gang. Sodra die uitslag bekend is, sal dit amptelik bekend gemaak word. ‘n Banier is verlede Donderdag voor die George-burgersentrum onthul om dank aan God te betuig vir Sy beskerming tydens verlede jaar se brande. Van links: Neels Barnard, Georgebrandweerhoof, Joe Johnston, Mosselbaai-brandweerhoof, Mervyn Nefdt, brandweerhoof van Acsa, Freddy Taver, brandweerhoof van die Garden Route-distriksmunisipaliteit, Andries Franken, burgemeester van die Overberg-distriksmunisipaliteit, Memory Booysen, burgemeester van die Garden Route-distriksmunisipaliteit, Melvin Naik, George se burgemeester, John Harold Cleophas, burgemeester van die Weskus-distriksmunisipaliteit, Trevor Botha, George se munisipale bestuurder, Deon van Wyk, adjunk-brandweerhoof van die Garden Route-distriksmunisipaliteit en Wayne Sternsdorf, brandweerhoof van Knysna. INLAS: George-brandweer afdelingsbevelvoerder, Santa Sternsdorf, steek ’n kers aan voor daar ’n minuut stilte was ter nagedagtenis aan die mense wat verlede jaar hul lewens tydens die brande verloor het.