Kos en water vir mense en troeteldiere in nood
Mense wat boere, plaaswerkers, almal se gesinne en selfs hul troeteldiere in die droogtegeteisterde Oudtshoorn-omgewing wil help, kan nog tot Saterdag bydraes lewer.
'n Konvooi onder die vaandel van die South African Water Warriors vertrek Saterdagoggend om 05:00 uit Kaapstad met hulp.
Indien nodig sal van die voertuie in die konvooi op pad na die Klein-Karoo, van die bydraes in die verskillende dorpe optel.
Pieter du Plessis van die organisasie het aan die George Herald gesê mense kan nog bydraes lewer. In George kan mense bydraes aflaai by Laingstraat 52A, George-Suid.
Volgens Du Plessis gaan die stigter van die organisasie, Deon Smit, Saterdag van Kaapstad na Oudtshoorn saamry. Die organisasie is aanvanklik gestig om water te versprei aan mense in landelike gebiede wat in nood is as gevolg van die droogte.
Dit het later uitgebrei en deesdae word ook in die behoeftes van plaasboere, plaaswerkers en almal se gesinne voorsien.
Saterdag sal onder meer water, kos en huishoudelike produkte na Oudtshoorn geneem word. Kos vir mense se honde en katte word ook ingesamel want hulle word as deel van mense se gesinne beskou. Dit is van oor die land ingesamel.
Sowat 105 gesinne is geïdentifiseer.
Die goedere sal na 'n sentrale punt in Oudtshoorn geneem word en vandaar versprei word.
Mense wat nog skenkings wil maak kan Du Plessis bel by 076 844 6435. Belangstellendes kan ook 'n e-pos stuur na pieterpdp@gmail. com.
Die werksaamhede van die organisasie kan ook op Facebook gevolg word.
Saterdag sal mense op Facebook kan volg hoe die konvooi vorder. Mense is ook welkom om vir dele van die rit saam te ry.