Kragkrisis kry aandag
Terwyl inwoners en sakeondernemings die impak van beurtkrag aan eie bas voel, sit hulle nie in sak en as nie. Hulle maak planne om elektrisiteit te kry van alternatiewe kragbronne.
Verteenwoordigers van maatskappye wat betrokke is by die verkoop van alternatiewe kragbronne, het bevestig dat navrae en verkope die afgelope tyd drasties gestyg het.
Melanie Ousley van MLT Solar in George het gesê sedert November was daar 'n 50% styging in navrae en verkope. Dit wissel van groot maatskappye tot die gewone man in die straat en pensionarisse.
Van die mense koop toerusting wat hul rekenaars en televisiestelle aan die gang kan hou tydens beurtkrag. Daar is ook mense wat toerusting koop wat in 'n hele huis se elektrisiteitsbehoefte kan voorsien.
Mense kyk ook na alternatiewe kragbronne al is daar nie beurtkrag nie. Hulle argument is dat elektrisiteit baie duur is en kyk na alternatiewe bronne met die oog op die toekoms.
Johannes van der Walt van
Power Hour het gesê toe daar onlangs beurtkrag was, het hulle rekordverkope gehad.
Navrae het ook vertiendubbel.
"Ons moes selfs een dag ons winkel sluit, omdat ons nie genoeg voorraad
gehad het nie." Mense koop onder meer batterye, omskakelaars, ligte wat met sonkrag werk en battery aangedrewe ligte."
Die kopers wissel oor 'n breë spektrum. Dit sluit byvoorbeeld bejaardes wat elektrisiteit benodig vir mediese redes en baie klein sakeondernemings in.
"Mense vertrou nie meer vir Eskom nie en begin kyk na alternatiewe kragbronne vir die toekoms," het
Van der Walt gesê.
Dr. Dennis Farrell, voorsitter van die George-sakekamer, het gesê dat die instansie onlangs gesprekke gehad het met die George-munisipaliteit oor die kragsituasie. "Ons is meegedeel dat die munisipaliteit daarna kyk om navorsing te doen oor alternatiewe kragbronne."
Die sakekamer en die munisipaliteit gaan voortaan ook geskeduleerde vergaderings hou om die kragsituasie te bespreek.
Volgens Farrell was daar die afgelope week of twee nie beurtkrag nie en dit gaan nou bietjie beter, maar mense kyk steeds na alternatiewe kragbronne. Volgens hom is dit 'n feit dat beurtkrag 'n negatiewe impak op sakeondernemings het. Dit kos maatskappye geld om in alternatiewe kragbronne te belê.
Dr. Willie Cilliers, voorsitter van die AHi Wes-Kaap, het gesê daar sal beslis weer beurtkrag wees. Die AHi Wes-Kaap is besig met gesprekke met die Wes-Kaapse provinsiale regering.
Op 12 April vind 'n vergadering by Goudini-spa plaas. Die AHi Wes-Kaap, die provinsiale regering en verteenwoordigers van toerisme, die landbou en die sakesektor word na die vergadering genooi. "Ons sal koppe bymekaar sit hoe om beurtkrag te hanteer."
Cilliers is bekommerd oor die negatiewe impak van beurtkrag op klein sakeondernemings. Dit kan lei tot werksverliese.