Slaap-slaap of wakker?
Toerisme se moontlik enorme impak op mense se lewens, aan die ontvangs- én dienskant, word steeds maklik misken. Die nasionale regering is ernstig om toerisme te bevorder. So het ‘n aktiewe minister van toerisme self onlangs ene Gigaba, toe nog minister van binnelandse sake, in die openbaar teengegaan oor uiters beperkende, dwase beheermaatreëls. Die regering is daartoe verbind “to promote responsible tourism for the benefit of
South Africa and for the enjoyment of all its residents and foreign visitors”.
Ook die nasionale ontwikkelingsplan (ongelukkig tans maar stofbedek) erken toerisme as “one of the main drivers of employment and economic growth, and envisages the promotion of South Africa as a major tourist and business events destination” (Uitkoms 4); vir die skepping van “decent employment through inclusive growth as comprehensive rural development and land reform” (Uitkoms 7). Let wel - ook landelike ontwikkeling.
Toerisme verdien sowat R150 biljoen jaarliks direk vir die land, sowat 3% van die nasionale produk. Wanneer egter bereken word hoe verwante, bydraende sektore diens doen, klim die waardeketting tot meer as 10% van die nasionale produk met ‘n totaal van verby die
R420 biljoen. Dit impliseer direkte en indirekte werkskepping tot by 1,5 miljoen wat 10% van nasionale indiensneming impliseer. Die Wes-Kaap word openlik, maar meestal so bietjie om die draai, as Suid-Afrika se mees ontwikkelde toerismestreek erken. Een uit elke 10 werknemers in die Wes-Kaap maak ‘n lewe uit toerisme, meer as enige van die ander provinsies.
Die hooffokus in die provinsie is steeds ver oorheersend stedelik - die Kaapse metro met Tafelberg as uitstaande, oral bekende simbool - een van die Sewe Wêreld Natuurwonders. Daarna volg die Victoria en Alfred Waterfront. Indien meer mense gesofistikeerd na Robbeneiland geneem kan word, sal dié attraksie ongelooflik groei. Buite die metrogebied is die WesKaapse wynroetes hoog op die lys.
Maar moenie verbaas wees nie, jazz is byvoorbeeld besig om as trekpleister te groei!
Die Tuinroete figureer tweede op die Wes-Kaapse lys, as nie-nabye metrogebied. Goeie samewerking met Wesgro bemark tans die streek suksesvol. Tog wil die Wesgro-spesialiste net een foto groot op die bemarkingsvoorblad hê - Tafelberg, met die stad en see in die voorgrond. Geen volstruis of Outeniquaberge nie.
Verrassend is die groeiende belangstelling van buitelanders in voorheen niegenoemde plekke soos Genadendal as die oudste Morawiese dorpie in Afrika, met geboue van 1738. Die Klein-Karoo behou sy betowerende aantreklikheid. Ek kon byvoorbeeld onlangs ‘n groep Australiërs net nie uit die dorre landskap wegkry nie. Moet nie in die verband die rol van top-restourante in kombinasie met goeie streekwyne buite rekening laat nie.
As ons net kan besef dat ons wakker aan alle fronte moet optree. En alle kwaliteite hoog stel. Ontwikkeling kom selde vanself, ook in toerisme. So het my familie onlangs, net noord van Londen, die mooiste natuurskoon en goeie toerismeversorging ervaar. Waarom daarteenoor ‘n onrustige, moorddadige Suid-Afrika op soek? Ons mag nie aan die slaap wees nie. So het die World Travel & Tourism Council (WTTC), so pas Ethiopië as die Afrika-land met die hoogste toerismegroei uitgewys - ‘n bykans ongelooflike 48,5%. Ons moet dadelik ondersoek instel - hoe en waarom?
Ons Wêreld verskyn elke tweede week.