Eden-spelers presteer by SA’s
Eden-skaak het ‘n nasionale kampioen opgelewer by hierdie jaar se SA junior geslote skaakkampioenskappe wat van
17 tot 22 Maart in Benoni gehou is.
Vyf dogters van Eden is hierdie jaar genooi om aan die toernooi deel te neem en teen die beste skaakspelers in ons land mee te ding vir ‘n plek in die Suid-Afrikaanse skaakspan. Net om genooi te kon word na hierdie kampioenskappe maak reeds van elkeen ‘n wenner in eie reg.
In die o.10-dogters het Sydney Michaels ‘n telling van 4,5 uit 9 behaal en sy was algeheel 13de in haar groep.
Die o.14-dogter, Sharna Prince, het in haar eerste SA geslote skaakkampioenskappe ‘n goeie prestasie van 4 uit 9 behaal, wat haar ‘n algehele 16de plek in haar groep besorg het.
Dit was ook Lauri Kay Michaels (dogters o. 16) se vuurdoop. Sy het goeie skaak gespeel en alhoewel sy nie punte kon kry nie, nie het sy baie goeie ondervinding opgedoen.
Vir Sune Swart, in die dogters o.18-groep, was dit die laaste keer wat sy kon deelneem. Sy het uitstekend gevaar en ‘n totaal van
4,5 uit 9 behaal, met vyf wedstryde gelykop, twee verloor en twee gewen.
Sy was een van drie spelers met dieselfde puntetelling en na haar uitkloppot was sy algeheel in 10de plek. Hiermee het Suné gekwalifiseer vir die SA span wat die Commonwealth later dié jaar kan bywoon.
Die ster van die Eden-span was Nicola Putter. In die dogters o.16-afdeling het sy tot op die laaste teruggeveg en geëindig met ‘n telling van 6,5 uit 9.
Drie van haar teenstanders het dieselfde puntetelling gehad en uitkloppotte moes weer gespeel word, waar Nicola as die wenner uit die stryd getree het.
Nicola is dus die dogters o. 16-kampioen vir 2019. Sy sal later die jaar Suid-Afrika by die World Youth, African Youth, Commonwealth verteenwoordig.
Hierdie spelers is ware ambassadeurs vir Eden en ‘n inspirasie vir ander. Eden-skaak is trots op hulle.
- Berig deur George en Annemarie Swart