Nuwe junior downsindroom-wêreldrekord vir Minke Janse van Rensburg
Met die goue medalje wat die 14-jarige Minke Janse van Rensburg nou in die 50 m-vryslag by die Suid-Afrikaanse Sportvereniging vir intellektueel gestremde persone (SASA-II) se ope nasionale swemkampioenskap in Kimberley gewen het, het sy nie net haar 27-jarige rolmodel, Melisa O’Neil, met meer as twee sekondes geklop nie, maar ook haar bestaande junior downsindroom-wêreldrekord en Ope Afrika-rekord (alle ouderdomme) verbeter.
Minke se nuwe 50 m-vryslaglangbadtyd van 37.61 sekondes is slegs 0.34 sekondes stadiger as die 29-jarige Mexikaan Dunia Camacho se ope downsindroomwêreldrekord van 37.27 sekondes.
Sy het by dié byeenkoms nog 'n goue medalje, vier silwer- en twee bronsmedaljes, alles in die ope kategorie, gewen.
Sy het ook nuwe downsindroom junior Afrika-rekords in die 50 m-rugslag, 50 m-borsslag en
100 m-borsslag opgestel.
Minke sê sy het verlede jaar tydens die DSISO-wêreldkampioenskappe in Kanada vir Dunia gesê sy gaan haar eendag, as sy groot is, klop.
Sy het by dié byeenkoms 'n bronsmedalje in die swemnommer gewen nadat sy die enigste junior swemmer uit 57 swemmers in die uitdunne was wat vir die eindstryd gekwalifiseer het.
Hierdie nuwe rekord asook die ander tye wat Minke by die onlangse nasionale kampioenskappe geswem het, beteken dat Minke een van slegs drie Suid-Afrikaanse downsindroomvroue is wat voldoen aan die A-kwalifiserende standaarde vir die Global Games, wat gedurende Oktober vanjaar in Brisbane, Australië, gehou word.
Minke sê sy is besonder dankbaar teenoor haar afrigter, Sybeth Hughes van Fish Eagle Aquatics in George, wat haar na Kimberley vergesel het.
Minke hou tans drie junior downsindroom-wêreldrekords, twee Ope (alle ouderdomme) Afrikarekords en 12 junior Afrika-rekords.
Sy het ook 'n verdere drie
Afrika ope aflosrekords agter haar naam as deel van die nasionale downsindroomspan.