Nooddienste staan saam
Sowat 40 lede van verskeie nooddienste en reddingsorganisasies, asook vrywilligers van George, het verlede week saamgespan met dieselfde visie. Om enige oorlewendes te red en die wrak van ‘n VW Caravelle uit die see te herwin sonder dat enigiemand beseer word.
Dit kom ná die 35-jarige Heidi Scheepers en haar twee kinders, Hugo (2) en Cozette (6) vermoedelik Dinsdagaand, 22 Oktober in hul voertuig by ‘n krans in die Voëlklip-gebied, afgestort het.
Hugo se liggaam is Donderdagoggend in die water naby die wrak gevind en Heidi se liggaam is Saterdagmiddag in die water naby Heroldsbaai gevind. Cozette was teen druktyd nog nie gevind nie.
“Ons was reeds vroeg Woensdagoggend op die toneel ná ‘n lid van die publiek die polisie gekontak het. In so ‘n situasie hoop ons altyd om almal te vind, nie vir ons eie welstand nie, maar vir dié van die betrokke families,” sê Metronooddienste se reddingsbestuurder, Richard Botha.
Verskeie spanne bestaande uit Metronooddienste en hul forensiesetouespan, George-brandweer, Eden-brandweer, ER24, J&B Towing, verskeie lede van die polisie, polisieduikers, NSRI en die AMS-reddingshelikopter, het altesame nie minder as 30 ure op die toneel spandeer nie. Die wrak van die voertuig is eers laat Donderdagaand herwin.
Hoewel die toneel volgens Botha uitdagend en operasioneel baie gevaarlik was, was dit ‘n goeie operasie in terme van samewerking.
“Al die betrokke eenhede het as een groot span saamgewerk om ons beste te gee. Ek bedank ook die inwoners van George wat hulle tyd opgeoffer het om ons by te staan.”
Op ‘n navraag oor die beraamde monetêre waarde van die operasie kon Botha teen druktyd nog nie ‘n bedrag bevestig nie. “Ons primêre fokus is om mediese reddingswerk te doen. Hoewel dit ‘n duur operasie was kon ons nog nie ‘n kosteberaming doen nie.”
In so ‘n situasie hoop ons altyd om almal te vind.