Rosemoor-dienssentrum se seniors lug griewe
Emosies het hoog geloop tydens ‘n ledevergadering van die Rosemoordienssentrum verlede Donderdagmiddag, 16 Januarie.
Die vergadering is deur die bestuurskomitee belê om ‘n aantal sake waaroor die senior burgers ontevrede was, te bespreek.
Lede is ongelukkig omdat hulle voel die komitee neem besluite sonder om hulle behoorlik te raadpleeg.
Vrae is gevra oor onder meer die proses wat gevolg word om ‘n nuwe bestuurder vir die sentrum aan te stel. Die pos is ekstern geadverteer, maar die proses is gestop om interne kandidate eers kans te gee om aansoek te doen. Die bestuurskomiteevoorsitter, biskop Henry McCombi het verduidelik dat dit ingevolge arbeidswetgewing vereis word.
Daar is gefouteer deur die pos eers ekstern te adverteer. Die interne proses sluit einde Januarie en dan sal hulle weer ekstern adverteer. Die enigste twee interne kandidate is nie deur van die lede in die vergadering as geskik beskou nie en hulle dring aan op ‘n eksterne persoon. Die inwoners wil ook insette lewer in die aanstelling. McCombi het gesê dat kandidate deur ‘n paneel geassesseer sal word en deur ‘n keuringsproses sal gaan.
Nog ‘n twispunt was bakspuitwerk wat in Desember aan die dienssentrum se enigste vervoermiddel, ‘n kombi, gedoen is. Een van die ontevrede seniors, Sandra Nortjé, het gesê hulle is nie geleentheid gegun om te besluit watter kwotasie aanvaar moes word nie. “Is die werk gedoen dit waarvoor ons betaal het?”
Volgens die bestuur het hulle die laagste kwotasie aanvaar. Die werk moes gedoen word omdat die kombi in ‘n gehawende toestand was en dit deur die toets moet gaan.
McCombi het na die vergadering die kombi gaan inspekteer. Hy het vandeesweek aan die George Herald gesê die diensverskaffer het gedoen wat op die kwotasie uiteengesit was. “Ek het nogtans met hom gaan praat en hy het ingestem om na ‘n paar goedjies te kyk.
Die binnekant van die kombi is klaar reggemaak, maar ons het besluit om nie binne te spuit nie want ons het gedink ons wil nie nog ‘n uitgawe aangaan nie.”
Terwyl die kombi buite aksie was, het die bestuur ‘n nuwe motor aangeskaf, maar inwoners meen dit is te klein en onprakties. Volgens Nortjé is daar tydens ‘n vorige ledevergadering genoem dat ‘n sewesitplekvoertuig of ‘n ander kombi oorweeg sou word.
Volgens McCombi het hulle na verskeie motors gaan kyk en kwotasies ingewin, maar ‘n sewesitplek was te duur. Omdat die kombi nie gebruik kon word nie, moes hulle dringend ‘n voertuig kry ingeval een van die inwoners siek sou word. Daar is op die bekostigbare opsie besluit omdat hulle nie skuld wou aangaan nie.
Die bestuur het egter nou onderneem om die motor vir ‘n groter voertuig in te ruil. “Ons sal skenkings nodig hê om dit aan te skaf en beplan om ‘n paar mense om hulp te nader. As voorsitter maak ek altyd seker dat ons in lyn met die wet is en hier was dit ook die geval.”
Hy het gesê die sentrum se boeke is geoudit en is oop vir publieke insae. “As ons nie jaarliks geouditeerde state aan maatskaplike dienste lewer nie, sal die sentrum nie sy subsidie ontvang nie.”
Abraham Spandiel, die tesourier, het gesê die inwoners se ontevredenheid is nie geregverdig nie. Die bestuur doen wat hulle kan vir hulle beswil. Hy het sy bedanking aangekondig en gesê dis met hartseer dat hy dié stap neem.
Hy het die finansies van die sentrum oor die afgelope 12 jaar van ‘n nul-balans af omgedraai en laat hulle met ‘n positiewe bankbalans agter, selfs ná die aankoop van ‘n nuwe motor. “Ek het hierdie werk na die beste van my vermoë gedoen, vir geen vergoeding nie, maar ek is nou klaar.”