Eden-skaak vaar goed by SA ope
Skaakspelers van Eden het hul man gestaan by die SA Junior Skaakkampioenskappe (SAJCC) en met 'n paar akkolades weggestap.
Die kompetisie het van 4 tot 12 Januarie in Boksburg plaasgevind.
Die o.14A-span het in die B-afdeling gespeel en het net-net 'n bronsmedalje misgeloop.
Kobus Geyser, Eden se bord 1, was die beste bord 1-speler by die toernooi en het met 'n bordprys weggestap.
George Swart jr., voorsitter van die George-skaakklub, het sy staal gewys toe hy gelykop gespeel het teen die wêreld se no. 6skaakspeler tydens 'n 'Simultaneous'.
Sune Swart (o. 20) het hierdie jaar haar 10de agtereenvolgende SAJCC bygewoon, ook 'n prestasie om op trots te wees.
Eden se span het 89 spelers, 13 spanbestuurders en twee afrigters ingesluit. Die eerse gedeelte van die toernooi was die spankompetisie waar die meeste spanne in die ouderdomsgroepe o. 8 tot o. 20 in die 'Championship'-liga, die hoogste afdeling by die toernooi, deelgeneem het. Die spanne het sterk kompetisie gehad, maar het deurentyd hulle beste gegee en geveg tot die bitter einde.
Vyf Eden-spelers was deel van 'n groep van 108 wat die geleentheid gehad het om 'n 'Simultaneous' teen die besoekende grootmeester, Levon Aronian van Armenië, te speel. Aronian is tans die 6de beste speler in die wêreld.
Na afloop van die spankompetisie kon individuele spelers aan 'n 'Wildcard' deelneem om te probeer kwalifiseer om aan die SA Junior Geslote Skaakkampioenskappe deel te neem.
Twee van Eden se spelers, Grant Campbell (seuns o. 18) en Sharna Prince (dogters o. 16), het hieraan deelgeneem. Sharna was algeheel tweede en gaan in Maart Benoni toe om aan dié prestige kampioenskap deel te neem. Grant het goed gevaar teen sterk kompetisie, maar het ongelukkig nie gekwalifiseer nie.
Die bestuur van Eden-skaak is baie trots op die Eden-spelers wat hulle beste gelewer het by die SAJCC en bedank ook die ouers en spanbestuurders vir hulle ondersteuning, asook die vier arbiters in die area, Hans Ottervanger, George Swart (sr.), Azriel Johnson en Magda Conradie, vir hul harde werk by die SAJCC.