Steeds geen tartanbaan
Byna twee jaar nadat die weg gebaan is vir die bou van George se eerste tartanatletiekbaan by die Rosemoorsportstadion, moet atlete steeds op grondof grasbane oefen en meeding.
Die George Herald het reeds in Maart 2018 berig dat die weg gebaan is vir die bou van die baan. Geld is toe bewillig van die nasionale regering (Division of Revenue Act) en die munisipaliteit sou ook 'n bydrae lewer.
Sedertdien was daar verskeie kinkels in die kabel en verskonings is aangevoer vir die vertragings.
Atlete en inwoners se geduld is tot op die uiterste beproef.
Tydens 'n besoek aan die Rosemoorsportstadion verlede week was dit duidelik dat atlete nie sal kan meeding op die grondbaan na die reën nie.
Dit wou voorkom of voorbereidings gemaak word op die grasveld in die middel van die baan vir 'n atletiekbyeenkoms.
Wilbur Harris, lid van die Georgestadsraad, wat geveg het om te verseker dat George so 'n baan kry, en wat naby die Rosemoor-sportstadion woon, het gesê daar is verwagtinge geskep.
Mense wil by hom weet wat aan die gang is.
Hy is bekommerd dat George die baan kan verloor.
Debra Sauer, munisipale woordvoerder, het gesê die vertragings is te wyte aan finansieringkwessies wat einde Februarie 2020 by die aanpassingsbegroting opgelos behoort te word.
Dit bly uiteindelik 'n besluit van die raad en nie 'n administratiewe besluit nie.
Die munisipaliteit het nie geantwoord op vrae oor wanneer bouwerk sal kan begin en wanneer dit voltooi sal wees nie.