Vicbaai-riooldiens ‘moet verander’
Twee voorvalle van rioolstorting uit die riooltenk van Seabreeze Cabanas op Victoriabaai die afgelope Desemberseisoen het soos verskeie kere in die verlede veroorsaak dat rioolwater op die parkeergebied uitloop.
Daar was glo ook 'n storting uit 'n tenk onder by die ablusiegeriewe naby die strand en riool het met die stormwaterpyp langs op die strand uitgeloop.
'n Ontevrede inwoner van Seabreeze, André Groenewald, meen dinge sal verbeter as Victoriabaai by die stad se rioolnetwerk opgekoppel word. Tans word riool onttrek uit twee tenks, een wat Seabreeze bedien en een van die George-munisipaliteit wat die res van die baai se inwoners bedien. Die twee tenks is aan weerskante van Seabreeze se ingang geleë. In die Desember-seisoen word die tenks gemiddeld drie keer per dag gediens en volgens Groenewald, gaan onttrekking gepaard met 'n erge geraas en onaangename reuke.
Hy het die George-munisipaliteit genader oor die moontlike opkoppeling van Seabreeze se tenk by dié van die munisipaliteit s'n en die siviele ingenieursdepartement was te vinde vir sy voorstel. "Na my mening beteken die opkoppeling van die twee tenks die eerste stap in die aansluiting van Vicbaai by die munisipale netwerk wat in elk geval uiteindelik gedoen moet word," sê hy.
Die departement vereis egter dat Seabreeze se direksie 'n amptelike versoek in dié verband rig, maar volgens Groenewald sloer hulle. George-munisipaliteit se direkteur vir siviele ingenieursdienste, Regenald Wesso het bevestig dat die Seabreeze-koppeling 'n kwessie is wat die Seabreeze-ontwikkelaar en -huiseienaarsvereniging met sy direktoraat sal moet opneem vir verdere bespreking en ondersoek.
Hy het verder gesê om Victoriabaai se rioolstelsel alleen op te koppel met die bestaande George-rioolstelsel is tans nie finansieel haalbaar nie. "Dit is as gevolg van die kompleksiteit en afstand tot by die naaste hoofpompstasie in Thembalethu. Beplanning vir 'n moontlike toekomstige Victoriabaai-rioolopkoppeling met die George-sisteem is in plek. Die mees effektiewe opsie wat ondersoek is, skakel in by die beoogde toekomstige ontwikkeling van die Sallywood-grond en dié se rioolstelsel, vanwaar dit na die rioolsuiweringswerke toe sal kan vloei."
Hy sê die moontlikheid van 'n afsonderlike rioolbehandelingstelsel vir Victoriabaai "is die onderwerp van verdere ondersoeke" ten einde die mees voordelige oplossing te vind vir die Victoriabaai-omgewing. "Die huidige onttrekkingsdienste was tot nou toe nog voldoende en sal voortgaan."
Jacques Fourie, voorsitter van die Seabreeze-direksie, het by navraag slegs gesê, "Die saak is onder bespreking."
Die huidige onttrekkingsdienste was tot nou toe nog voldoende en sal voortgaan.