Vandale kos Go George R1,5m

Dit gaan die George-munisipaliteit

R1,5 miljoen kos om die skade wat vandale aan 105 (90%) van die 115 standaard busskuilings van Go George aangerig het, te herstel.

Go George-bestuurder, James Robb, het die omvang van die skade by navraag aan die George Herald bekend gemaak. "Daar is uiteindelik ’n begroting beskikbaar om hierdie jaar met herstelwerk te begin," het hy gesê.

Strukturele skade aan die busskuilings word aangerig deur die breek of beskadiging van glas- en metaalpanele. Volgens Robb bestaan 'n standaard busskuiling uit een sitoppervlak en sewe panele, waarvan drie uit glas bestaan. Tans moet altesaam 271 glaspanele vervang word.

Robb het gesê 81 vinielplakkers met passasiersinligting is die afgelope jaar op busskuilings vervang nadat dit óf deur graffiti ontsier óf geskeur is. "Die gemiddelde koste van herdruk en opplak is ongeveer R800 per plakker. As deel van deurlopende navorsing en toetsing om 'n oplossing vir die probleem te vind, is beskadigde panele by sommige van die skuilings vervang met geperforeerde staal, Perspex, Plexiglass en soliede staalplate om duursaamheid te toets.

"Die aanvanklike glaspanele wat uit drie lae glas bestaan het, is gekies vir veiligheidsredes om sigbaarheid van passasiers binne die skuiling te verseker, sowel as om passasiers in staat te stel om aankomende busse te sien. Hierdie praktiese, en in sommige gevalle wetlike voorskrifte sal dalk aangepas moet word om die skuilings in een stuk te hou."

Gevra of dit die moeite werd is om bushaltes telkens weer te herstel, het hy gesê instandhouding moet plaasvind. "Ons passasiers verdien nie om gepenaliseer te word deur vernielsugtiges wat geen respek vir openbare eiendom het nie."

Hy het gesê hulle gaan poog om die probleem hok te slaan en het in gesprek getree met die polisie en die munisipaliteit se departement van gemeenskapsveiligheid. Verder word beoog om die verskillende buurtwagte in die dorp te betrek. "Nie net kan buurtwagte ons help om vandalisme te bekamp nie, maar ook om 'n oog te hou oor bushaltes waar passasiers op sekere tye van die dag of aand onveilig voel."