Muni skitter in afwesigheid
George Toerisme steun enige inisiatief of produk wat toerismegeleenthede in George en omgewing ontsluit. So het George-munisipaliteit gereageer op vrae oor waarom hulle nie 'n onlangse werkswinkel oor die Montagu-pas bygewoon het nie. Garden Route-distriksmunisipaliteit was wel daar.
Athane Scholtz, munisipale woordvoerder, het gesê die burgemeester se kantoor is nie bewus van 'n skriftelike uitnodiging nie.
"In September 2019 is 'n voorlegging per e-pos aan die kantoor van die burgemeester gestuur waarop die inisiatief onder George Toerisme se aandag gebring is, maar Toerisme is ingelig dat hul betrokkenheid nie op daardie stadium nodig was nie, en dat die organiseerders die administrasie sal kontak wanneer die projek meer gevestig is. George Toerisme se bestuurder Joan Shaw vermoed dat dit verklaar waarom nie sy of die beampte verantwoordelik vir toerisme-ontwikkeling die onlangse uitnodiging ontvang het nie.
"Die Montagu-pas was voorheen deel van die destydse Outeniqua Hop-toerisme inisiatief. Dit was ‘n wonderlike ry-en-besoek uitstappie. ‘n Volhoubare inisiatief in die pas kan uiteraard ‘n wonderlike toevoeging tot George se toerismeproduk wees," het Scholtz gesê.
George Toerisme nooi almal wat produkte begin of uitbrei, om die toerisme-kantoor in te lig en hul projekte op hulle databasis te registreer. Dit sal help om die groter toerisme-prentjie vir bemarkingsinisiatiewe in te lig.
Prof. Francois Hanekom, dryfkrag agter die werkswinkel, het gesê dit is jammer die munisipaliteit was nie daar nie. "Ons het per skrif en tydens formele afsprake met hulle gekommunikeer."
Hy sal graag wil sien dat die Georgemunisipaliteit betrokke raak by inisiatiewe oor die pas. "Dit raak hulle direk."
Volgens Hanekom het hy baie positiewe terugvoering na die werkswinkel ontvang.