Genealoë kyk na Britse Setlaars
Een van die fokuspunte vanjaar van die Genealogiese Genootskap van Suid-Afrika se Suid-Kaapse tak, gaan die koms van die Britse Setlaars in 1820 wees. So sê Abrie de Swardt, wat verlede Woensdag, 5 Februarie, tydens die organisasie se algemene jaarvergadering in die Suid-Kaap as voorsitter herkies is.
Die ondervoorsitter van die afgelope paar jaar, Wilkie Barkhuysen, is ook in sy posisie herkies, terwyl Selma Crouse die nuwe sekretaris van die tak is. Sias Coetsee is herverkies as tesourier.
Volgens De Swardt beoog die tak om verskeie navorsingsprojekte oor familiegeskiedenis in 2020 aan te pak, en verskeie interessante sprekers uit te nooi na ledevergaderings.
Die 200ste herdenking van die Britse Setlaars se koms (1820-2020) sal besondere aandag geniet.
"Daar is beslis 'n groeiende belangstelling in familiegeskiedenis. Mense benader dit uit verskillende perspektiewe. Vir die meeste mense gaan dit oor hul eie familiegeskiedenis."
Mense wil weet waarvandaan hulle kom. Hulle wil vasstel hoe hulle geskiedenis teruggeskryf kan word na hul oorspronklike stamvaders en watter bydrae hulle gelewer het in die oorspronklike land van herkoms.
Volgens De Swardt is dit in Amerika die derde grootste stokperdjie. In Skotland is dit die sewende belangrikste rede waarom toeriste die land besoek en in Ierland die negende belangrikste.