George Garden Centre vier 30 jaar van kwaliteit
Toe Piet Dyzel verlede naweek sy 70ste verjaarsdag gevier het, was dit nie nét 'n mylpaal verjaarsdag nie, maar ook die herdenking van die familiebesigheid se 30ste bestaansjaar.
Familie vriende en medesakelui het Saterdagaand, 15 Februarie, by die George Garden Centre (GCC), vroeër bekend as Die Plantjie Kwekery, saamgekom om dié twee hoogtepunte saam met die Dyzelfamilie te vier.
Tydens die geleentheid is 'n leeftyd van herinneringe herleef terwyl pa Piet 'n terugblik gegee het op die laaste 30 jaar vandat hy en sy vrou, Emma, die kwekery begin het.
"Ek is baie trots om vandag, op my 70ste verjaarsdag, te kan beleef hoe my seun, Piet jr., GGC met sukses uitbrei en klante wat ons oor die jare leer ken het, met trots dien. My kleinseun, Pieter, is ook al by die kwekery betrokke en sy pa se regterhand," het Dyzel tydens sy toespraak gesê.
Hy het verder vertel hoe sy dogter, Hannetjie en Piet jr. ook saam die Waentjie Kwekery, 'n tak in Stellenbosch, bestuur en uitgebrei het. Nie net is daar 'n wye verskeidenheid van plante en tuintoebehore by GGC beskikbaar nie, maar daar is ook 'n kerk en 'n restaurant, Oud en Jonk, op die perseel. Hier kan enigiets van troues tot verjaarsdagpartytjies gehou word. Buiten gewone restaurant ure, is Oud en Jonk Sondae ook oop vir heerlike middagetes.
Vir meer inligting rondom die lokaal kan Hannes of Jacky by 082 826 4717 geskakel word.
Die boere in die omgewing en die publiek is reeds deeglik bewus van die goeie kwaliteit en verskeidenheid van plante wat deur die Dyzels by GGC te koop aangebied word. Hulle spog veral met 'n opmerklike versameling binnenshuise plante. "Ons probeer altyd unieke plante aan die publiek verskaf en ons roem daar op om vriendelike diens te lewer. Almal is welkom om ons te besoek vir goeie afslagpryse.
Ons is soos een groot familie en verwelkom almal," sê Dyzel.
George Garden Centre is geleë op die R102 (lughawe pad) en kan gekontak word by 044 876 9169 of 082 872 2529. Of stuur 'n e-pos na pdyzel@gmail.com