Sprekers deel hul passie
Die tema van Outeniqua Dames Aktueel se laaste vergadering was 'Passie'.
Nelius van Greunen het sy passie vir die boerdery ten spyte van talle uitdagings met lede kom deel. Hy het vertel dat die vier Van Greunen-broers, hulle kundige bestuurspan en al hulle werkers daarna streef om ‘n dinamiese boerdery in harmonie met die pragtige omgewing tot voordeel van alle belangegroepe en tot eer van hul Skepper te bedryf.
Hulle kernbedrywe is melkproduksie en aartappel- en bloubessieboerdery en hulle streef dus na gesonde, bekostigbare voedsel.
Daar word ook aandag gegee aan die lewenskwaliteit van die plaasgemeenskap. Hulle het 'n eie kleuterskool, Ligdraertjie en eie rugbyklub, Union Stars. Vir die vier broers is die geestelike versorging ook van kardinale belang.
Heleen Steenkamp van Stellenbosch het die dames verseker dat ‘n boervrou 24/7 aan diens is. Sy beplan en bestuur. Sy is verpleegster, onderwyser, maatskaplike werker en sy moet haar gesin op geoliede wiele laat funksioneer.
‘n Boervrou leef saam met diefstal, plaasmoorde, droogtes, kragonderbrekings en grondonteiening. Sy word gebore ... nie gemaak nie. En vir haar is dit ‘n wonderlike voorreg.
Karleine Herbst, drama-onderwyseres van Hoërskool Outeniqua, het die lede getrakteer op kosbare voorlesings wat betrekking het op boerdery.
Die tema van die volgende vergadering is 'Fantasties!'.
As sprekers tree op: Petro Hansen – rubriekskrywer van Die Burger/Beeld: 'Fantastiese talent';
Jaco Kriek – saksofoonspeler: 'Fantastiese musiek';
Ian Bredell – kwadrupleeg: 'Fantastiese genade'.
Die vergadering vind op 25 Februarie by Emmaüs plaas. Tyd: 18:45 vir 19:00 - die hekke sluit om 19:00. Besoekers is welkom teen R50.
Vir meer inligting, kontak Magdaleen Smook by 044 873 6568 of 074 977 1986 of Louie Meyer by 044 874 6523 of 084 525 2130. - Louie Meyer