Plakkers op hol oor water en virus
Die tekort aan waterpunte en toilette in die plakkerskampe Moeggehuur en Schaapkopvallei in New Dawn Park het verlede Sondag moeilikheid in die woonbuurt veroorsaak. Inwoners van die plakkerskampe is op hul senuwees oor die koronavirus en vrees dat hulle die siekte gaan kry weens 'n gebrek aan water en sanitasie.
Protesaksies oor dié gebreke het op dieselfde dag plaasgevind as die uitrol van die Go George-busdiens se fase 4B.
'n Groep van sowat 50 mense het aan die aksies deelgeneem. 'n Motorband is in Missionstraat gebrand, 'n transformator is beskadig in New Dawn Park en die polisie is met klippe en puin bestook.
Lede van Publieke Orde Polisie-eenheid (Pops) moes skokgranate gebruik om die oproeriges uiteen te jaag.
Van die betogers is in hegtenis geneem, maar is later weer laat gaan. Hulle staar die volgende aanklagte in die gesig: openbare geweld, die verhindering van verkeersvloei en die beskadiging van openbare infrastruktuur (die teerpad).
Volgens die Suid-Kaapse polisiewoordvoerder, kapt. Malcolm Pojie, is die polisie se hulp ingeroep toe 'n Go-George-bus tussen die puin vasgekeer is. Die situasie is glo deur gesprekvoering met munisipale amptenare ontlont, maar die betogers het kort daarna hergroepeer en die polisie met klippe bestook.
'n Gemeenskapsleier van Moeggehuur, Garden Route-raadslid Theresa Fortuin, veroordeel die geweld wat tydens die betoging plaasgevind het. Volgens haar het beide die polisie en die inwoners verkeerd opgetree.
Hulp is naby
Volgens Chantel Edwards-Klose, munisipale woordvoerder, sal die departement van menslike nedersettings die toename van inwoners in die plakkerskampe evalueer, met die idee om ekstra waterpunte en ablusiegeriewe aan te bring. Fortuin het gesê hulle is dankbaar vir die hulp.
"Daar is te min water. Mense moet veral nou hulle hande baie was, en daar is net twee krane, wat nie sterk vloei nie. Die virus het almal op hol," het sy gesê.
Shaun Hector, 'n inwoner en gemeenskapsleier van Schaapkopvallei, sê daar is net een waterkraan en heelwat meer mense in hul nedersetting.
"Die kinders drink met hul monde aan die kraan - so ook enige verbyloper."
Die vallei se mense wag glo steeds vir 'n spreilig, en Moeggehuur wag vir hul kragvoorsiening. Beide dienste is reeds goedgekeur.