Covid-19 tref ook polisie in Tuinroete
Die verspreiding van die koronavirus, veral onder essensiële werkers, het die afgelope week ook hier aan die Tuinroete posgevat. In die Knysna/Plettenbergbaaiarea het 'n polisieman positief getoets vir Covid-19 en moes die res van die lede op sy skof, selfisoleer. In George het minstens vier munisipale verkeersbeamptes, almal op dieselfde skof, ook positief getoets, terwyl verskeie ander personeel met wie hulle in kontak was vir 14 dae moet selfisoleer. (Lees ook die artikel, Virus stalls mayoral vote, by www. georgeherald.com.)
Thembalethu-lede negatief
Kapt. Malcolm Pojie, die Suid-Kaapse polisiewoordvoerder, het vandeesweek bevestig dat sowat 12 polisiebeamptes en een reservis van Thembalethu-polisie, wat ook getoets is, se uitslae almal negatief was. Almal is terug by die werk. Hulle toetse kom na 'n vrou wat positief getoets het, in die dienssentrum was vir die aansoek vir 'n reispermit.
"As voorsorgmaatreël moes lede vir bietjie meer as 'n week selfisoleer terwyl hulle vir die uitslae gewag het. Die aanklagkantoor is tydelik geskuif na die hofgebou langs die stasie terwyl hulle die area ontsmet het. Dienste het normaal voortgegaan. Die polisiestasie was nooit gesluit nie. Die nodige protokol is gevolg."
Knysna/Plett-lede selfisoleer
Die kollegas van die lid van Plettenbergbaai wat positief getoets het, is in hulle tweede week van selfisolasie.
Die skof het gewerk by die Tsitsikammatolhek op die N2-snelweg. "Ook hier is lede waarmee die lid in kontak was gevra om vir 14 dae te selfisoleer en die polisiestasie is ontsmet."
Pojie sê lede word daagliks blootgestel in die uitvoer van hul pligte. "Elke dag wanneer lede aanmeld vir diens en voor uitplasing, word hulle gesif [screen] en hulle temperatuur word gemeet. Alle persele en voertuie word gereeld ontsmet deur ons eie spanne. Ons wil graag die Garde n Rou te distrik s munisipaliteit bedank wat ons ook hiermee bystaan."
Na patrollies vroeër die week in verskeie areas in George, asook elders in die streek, het die polisie weer 'n ernstige beroep op die publiek gedoen om tuis te bly.