Rosedale kry nuwe DA-kandidaat
Die DA het 'n nuwe kandidaat vir wyk 14,
Rosedale, se tussenverkiesing. Melvin Roelfse vervang hul vorige kandidaat, die bekende komediant Moses Williams.
Tans is daar nog geen datum beskikbaar vir die tussenverkiesing wat in die wyk, sowel as wyk 27 (Pacaltsdorp), moet plaasvind nie. Die tussenverkiesings is steeds geskeduleer vir Julie, maar 'n sterk moontlikheid bestaan dat die datum weer kan skuif. Die OVK sal hul weer tot die hof moet wend om uitstel te verkry.
Die Rosedale-gemeenskap het vroeër hul ontevredenheid oor Williams as gekose kandidaat uitgespreek.
Die algemene gevoel was dat
Williams nie die buurt volgens hulle "reg" sou verteenwoordig nie.
Die party het die hulp van Zoom-videokonferensies ingespan om verlede Woensdag onderhoude met potensiële kandidate te voer.
Roelfse is 'n gekwalifiseerde maatskaplike werker met 'n honneursgraad in maatskaplike werk wat hy aan die Nelson Mandela Universiteit in Port Elizabeth verwerf het. Hy is 'n boorling van George en woon tans in die Rosedale informele nedersetting.
"Met meer as 12 jaar ervaring as DA- en gemeenskapsaktivis, beskik Melvin oor die toewyding en deernis wat nodig is vir die pos van wyksraadslid," het MP Mimmy Gondwe, 'n kiesafdelingshoof van George, gesê.