Wees positief, anders...
Kobus Lazenby, Hessequa: Die wêreld-scenario is nou baie kompleks en vol uitdagings. Die Covid19-pandemie veroorsaak vandag dat ons met stres hand om die lyf loop. Die onsekerheid, magteloosheid, moedeloosheid, ingehoue woede teenoor regulasies en gevolglike stres is besig om toe te neem. Dit is ‘n onweerlegbare feit dat ons almal ook maar net gewone mense is wat worstel met hierdie emosionele probleme, spanning, depressie, moedeloosheid en self verwaarlosing. En ons mag, want ons is maar net gewone mense. Niemand is immuun teen die straf wat hierdie pandemie en die veranderende omgewing aan ons uitdeel nie.
Die idee "cowboys don’t cry" het al baie mense in die verlede vernietig. Dikwels word verwag dat daar ten alle koste ‘n fasade van trots, krag ("ek is taai") en oorlewing voorgehou moet word. Dit lei ongelukkig tot die vermorsing van energie in hierdie poging om eerlike emosies en moontlike krake te verbloem of weg te steek. Dit is gevolglik van uiterste belang dat ek eerlik-soekend in ‘n voortdurende proses van oorweging en evaluering van my lewenskwaliteite betrokke moet raak.
Ek moet soms tot stilstand kom om my eie intensiteit van sinisme en negatiwiteit teenoor die eksterne omgewing te bepaal. Dit sou kon beteken dat ek dalk uit ‘n psigiese en fisiese steriliteit moet uitbreek en iets aan die situasie moet doen.
Dit beteken dat ek moet begin werk aan ‘n positiewe gevoel en houding omtrent die lewe, die voortdurende verandering en die soms moeilik verstaanbare omstandighede.
Kortom, ek moet my lewenskwaliteite gebruik om aan myself te werk om ‘n positiewe gesindheid in my onbeheerbare omstandighede te ontwikkel, al is dit hoe moeilik, anders gaan ek dit psigies nie maak nie!