‘Dis ‘n voorreg om in voorste linie te wees’
Suster Emmerentia (Emme) Erasmus se toegewydheid en entoesiasme vir haar werk by Mediclinic George het haar die toekenning vir die topverpleegkundige vir 2020 by dié hospitaal in die sak gebring.
Die toekenning vereer uitmuntendheid onder verpleegkundiges en is verlede week oorhandig toe Internasionale Dag vir Verpleegkundiges gevier is.
"Ek is dankbaar en totaal verras oor die toekenning, maar ek glo elke verpleegster of verpleër verdien dit," het Erasmus beskeie aan George Herald gesê.
Erasmus het haar studies in 1996 aan Kovsies voltooi en in die jaar daarna as suster begin werk. Sy het in 2008 by Mediclinic George aangesluit.
"Ek is passievol oor my werk omdat ons as verpleegsters dienaars is. Dit is so vervullend om daar te wees vir mense in hul kwesbaarste tyd, en ek wil dit vir hulle beter maak. Dis vervullend om veral kritiek siek pasiënte te verpleeg en dan te sien hoe hulle beter word. Jy gee jou alles vir 12 ure, handig oor aan jou kollegas, vir die volgende 12 ure. Saam hoop, glo en vertrou ons op beterskap, en veral om te sien dat pasiënte die hospitaal weer gesond verlaat."
Covid-19
Gevra hoe sy voel om nou tydens die Covid-19-pandemie in die voorste linie te werk, het sy gesê, "Soos my tannie sê, die bose virus is vir ons almal 'n uitdaging in hierdie beroep. Ons tref baie goeie voorsorgmaatreëls om pasiënte wat
Covid-19 het, en ook potensiële Covidpasiënte te isoleer om ander pasiënte en personeel te beskerm.
"Dit bly 'n uitdaging om met masker en bril, en die volle persoonlike beskermingsuitrusting aan te werk, maar dis noodsaaklik en ons sal ook hierdeur kom. Dis vir my 'n voorreg om gesond genoeg te wees om nou in hierdie omstandighede te kan werk en 'n verskil te kan maak in pasiënte en hul geliefdes se lewens wat saam 'n moeilike pad stap tydens tye van siekte."
Hospitaalbestuurder Kassie Karstens, het hulde gebring aan verpleegkundiges en gesê hul onbaatsugtige werk word meer as ooit waardeer in tye soos hierdie. "'n Verpleegkundige wil altyd net dien. Elkeen van die verpleegkundiges was die eregaste vir die dag, maar ook die jaar, en ek wil hulde bring aan elkeen van hulle."