Covid-19 fnuik Heike se blomjaar op tennisbaan
Die tennisseisoen het vroeg vanjaar vir Heike Janse van Vuuren met 'n dolle vaart weggespring en die belofte van nog vele groot hoogtepunte ingehou.
Maar toe kom Covid-19 en knip Heike, een van ons talentvolste tennisspelers, se seisoen kort. In skoonstelle: 6-0, 6-0.
Wat 'n blomjaar kon wees, verander toe eensklaps in 'n (hopelik) tydelike droë seisoen.
Niemand het dié kishou voorsien nie. Maar dit wat Heike in die eerste drie maande van die jaar bereik het, vertel al klaar 'n tennissprokie.
In Januarie het sy die Eden Mini 1toernooi se vroue-enkelspeltitel by die Great Tennis-akademie in George ingepalm. Van die voorste juniors uit die Wes-, Suid- en Oos-Kaap was hier in aksie.
Einde Januarie is sy opgeneem in Tennis Suid-Afrika (TSA) se oefengroep vir die beste juniors in die land. Toe word Heike genooi om saam met Suid-Afrika se beste o.14- en o.16tennisspelers as baljoggies op te tree tydens die Match of Africa-toernooi tussen Roger Federer en Rafael Nadal in die Kaapstad-stadion. Agterna kon hulle met die twee topsterre informeel gesels, iets wat bitter min juniors beskore is.
Vroeg Februarie, met Covid-19 wat toe nog opwarm vir sy inval in SuidAfrika, reis Heike na Potchefstroom om aan die Internasionale Tennisfederasie (ITF) se J5-toernooi deel te neem. Talentvolle spelers vanoor die wêreld, wat tennis 'n loopbaan wil maak, het ingevlieg vir hierdie toernooi.
Heike het reggekry wat baie min Suid-Afrikaners nog kon doen deur die eindstryd te haal.
Hoewel sy verloor het, spreek dié prestasie boekdele van haar ontluikende talent om met sukses teen die wêreld se bestes mee te ding.
Ná haar tweede plek by die J5-toernooi in Potchefstroom is Heike gekies om Suid-Afrika te verteenwoordig by 'n groot internasionale seminaar in Indian
Wells, wat deur BNP Paribas vir die beste opkomende internasionale jong sterre aangebied word. Net een seun en een dogter is gekies om Suid-Afrika in Indian Wells te verteenwoordig,
Tydens die seminaar kry die juniors geleentheid om van die wêreld se topspelers te ontmoet en met hulle skouers te skuur. Maar toe moker Covid-19 dié planne van die baan af en word die seminaar gekanselleer.
Heike beklee tans die nommer een posisie op die SA tennisranglys vir dogters o.16 danksy haar puik vertoning by die J5-toernooi op Potchefstroom. Haar groot droom is om 'n professionele tennisspeler te word. Sy is gebore met fantastiese balvaardighede en hande en haar werketiek laat selfs haar afrigter,
Eduard Steyls, soms sprakeloos. "Heike is besig. Opgee, stilsit en halfpas vorm nie deel van haar woordeskat nie. Jy sal haar meeste van die tyd by die net kry besig om die bal weg te sit."
Steyls, wat Heike al van haar vormingsjare afrig, glo sy het die talent, toewyding en deursettingsvermoë om tennis op die hoogste vlak te speel. "Heike gaan nog groot hoogtes in tennis bereik. Sy is doelgerig en sterk selfgemotiveerd. Boonop is sy omring deur 'n wonderlike groep mense wat in haar glo. Hieronder tel haar sportmal ouers, Theo en Brigitte."
Wie kan verloor met só 'n formidabele span mense?