Meer as net een diens op ’n Sondag
Sommige kerke gaan meer as een diens Sondae hou om dit moontlik te maak dat mense wat wil, geloofsgeleenthede kan bywoon. Godsdiensleiers het in die algemeen pres. Cyril Ramaphosa se aankondiging Dinsdagaand verwelkom dat kerke, moskees, tempels, sinagoges en ander erkende plekke van aanbidding weer op 1 Junie hul deure mag open. Dit is onder streng voorwaardes wat insluit dat nie meer as 50 mense in dieselfde kerkgebou mag wees nie. Aanwesiges moet gesigsmaskers dra, daar moet sosiale afstand wees tydens die geleenthede en geboue moet gereinig word. Daar is egter nog vrae soos of gemeentelede se temperatuur gemeet gaan word en of hulle 'n register sal moet teken.
Ofskoon baie gemeentes die afgelope tyd van tegnologie gebruik gemaak het om gemeentelede te bereik, is dienste vir gemeentes in kerkgeboue laas op 22 Maart gehou.
Pastoor John Smith van die JCI Church het gesê die terugvoering wat hy kort na die aankondiging van lidmate ontvang het is baie positief. "Hulle is ook baie dankbaar dat die president erkenning aan godsdiens gegee het."
Smith het op Sondag 24 Mei saam met pastoor Hilton Langeveldt van Tikvah House of Prayer aan 'n gebedstaptog deelgeneem. Hulle het toe gevra dat kerke se deure weer oopgestel word.
Volgens Smith gee die jongste aankondiging weer hoop vir mense. In hul gemeente kyk hulle daarna om meer as een diens op 'n Sondag te hou.
Langveldt het gesê hulle is baie dankbaar dat daar 'n oor was wat geluister het. Volgens hom is die rol van die kerk in die samelewing uiters belangrik. "Jesus openbaar Sy hart van liefde deur die kerk."
Daar sal gekyk word hoe almal in verskillende tydgleuwe op Sondae geakkommodeer kan word.
Ds. Pieter van Santen, voorsitter van die NG kerk se ring in George en leraar van die Tuinedal-gemeente het gesê hy is ten gunste van die nuwe verwikkeling. In hul gemeente sal die kerkraad vergader en kyk hoe dit hanteer gaan word. Hy wag ook nog vir riglyne van die NG kerk se Wes-Kaapse sinodale struktuur. In hul gemeente sal waarskynlik meer as een diens op Sondae gehou word.
Pastoor Johan du Toit van die Nuwe Lewe Bediening het gesê dis 'n Bybelse opdrag om mense bymekaar te bring. By hulle sal beslis meer as een diens Sondae gehou word. Die logistiek sal nog in die gemeente uitgewerk word.