Proteas bring vreugde

Danksy die hulp van 'n proteaboer en sy werkers van Waboomskraal tussen George en Oudtshoorn, glimlag inwoners van Tuiniqua-versorgingsentrum weer breed.

Kemp Myburgh wat met proteas en speldekussings op sy plaas, Florburgh Proteas boer, het sowat 200 proteas aan die inwoners geskenk. Hy is ook die voorsitter van die plaaslike protea- en produsentestudiegroep.

Gewoonlik voer plaaslike produsente elke jaar miljoene proteas uit na onder meer Europa en China. Die proteas is wêreldwyd baie gewild en dit het 'n lang rakleeftyd.

Dit is arbeidsintensief en verskaf verskeie werksgeleenthede.

Die inperking het die bedryf op alle vlakke benadeel. Op vlak 5 moes hy tonne van die blomme weggooi. Op vlak 4 het hy meer beweegruimte gehad en sou hy daarvan kon uitvoer. Die risiko was egter te groot omdat die proteas op lughawens en in hawens vasgevang sou kon word omdat die instellings nie op volle kapasiteit bedryf is nie. Jannie van Zyl, wat help met vervoer by Tuiniqua, het Myburgh genader om te hoor of hy nie bereid sou wees om van die proteas te skenk nie. Myburgh het ingestem en die blomme is verlede week oorhandig.

Die proteas het baie vreugde verskaf en etlike inwoners het hom later persoonlik gebel om dankie te sê. "Dit was soos om liggies aan mense te verskaf," het hy vertel.

Hayley Hook, bemarker van Tuiniqua sê die proteas het herinneringe vir inwoners teruggebring van hul troudae en proteas in hul ouers se tuine.

Alani Voigt, sentrumhoof van Tuiniquaversorgingsentrum, sê dit het die gewone roetine opgekikker. "So-iets gee vir inwoners die gevoel dat mense hulle onthou."