Anti-skolers staan 83 000 sterk
Die Facebook-groep, Parents against
opening of schools, wat teen Woensdag reeds 83 000 lede gehad het, sou die week 'n dringende interdik ingehandig het om die minister van basiese onderwys, Angie Motshekga, te stop om haar planne te implementeer en meen dit moet herdink word.
Vanessa le Roux, ’n ouer, het die groep verlede Dinsdag na die minister se besluit om skole te heropen gestig.
"Binne twee dae het ons 50 000 ouers gehad wat dieselfde gevoel het."
Le Roux, oorspronklik van Oudtshoorn, woon nou in Kaapstad, en sê hul uitgangspunt is nie om die oopmaak van skole heeltemal te stop nie, maar net nie nou nie. "Wat is die haas? Hoekom die skole nou oopmaak voor die virus sy piek bereik het?" Op die oomblik, sê Le Roux, kan die minister ouers nie die versekering gee dat kinders veilig sal wees nie.
Sy sê hulle is van mening dat die minister se besluite irrasioneel is, en dat dit negatiewe gevolge vir hul kinders gaan hê. "Dis nie 'n praktiese besluit vir publieke skole wat klasse het van tussen 50 en 60 leerders nie. As die minister net bietjie wag, dan is daar genoeg tyd om dinge in plek te sit."
Dit is hoekom hulle op hofaksie besluit het. Sy meen die enigste opsie is om die wet met die wet te beveg.
Daar het wel ouers op die groep gekla dat hulle reeds briewe van skole ontvang het dat hulle moet besluit of hulle hul kinders gaan onttrek, want vertrekkaarte moet gereël word.
Die petisie gaan ook deel uitmaak van die hofstukke.
"Ons hoop om 100 000 handtekeninge te kry," sê Le Roux. Verder sê sy, het hulle nie op die oomblik 'n ander opsie vir ouers wat dalk kinders tuisonderrig wil bied nie. Sy sê hul missie met hofaksie was dat hulle teen Vrydag 29 Mei, in die Noord-Gautengse hooggeregshof aangehoor kon word en die besluit teen 1 Junie geïmplementeer kan word.
Le Roux het Woensdagoggend op die groep 'n boodskap geplaas dat hulle vir eers nie sal voortgaan met die hofaksie tot die minister haar besluit in die Government Gazette gepubliseer het nie.
Sy het ook gesê hulle wil liewer nie kanse waag en dan word hul aansoek uitgegooi nie. "Soos dinge nou staan, blyk dit dat die minister nog aanpassings kan maak tot haar besluit. Maar op die oomblik is daar geen wet om teen te staan nie."
Sy het ouers aangemoedig om die petisie te ondersteun.