Onnies terug by die skool
Skole het die week vir onderwysers heropen en hoofde sê sover het al hul onderwysers opgedaag. Selfs die onderwysunie Sadtu, wat gedreig het dat hul lede gaan wegbly, se lede het vir die eerste dag opgedaag.
Morton van Rooyen van Hoërskool George sê sover het dinge volgens plan verloop. Hulle kon die skool se gange, toilette en klaskamers met reinigingsmiddels skoonmaak. "Die uitdaging begin wanneer leerders terugkom skool toe."
Volgens voorskrifte moet lessenaars na elke periode, wanneer leerders klasse ruil ontsmet word. "Van Rooyen sê nog 'n uitdaging is die ontsmetting van toilette nadat leerders dit gebruik het, maar hulle werk aan 'n plan.
Kobus Koekemoer, waarnemende hoof van HTS Eden sê hul skool was gereed om die bestuurspan op
18 Mei te ontvang. "Ons bestuurspan het die hele week van 18 tot
22 Mei beplan vir 25 Mei, die dag waarop die onderwysers teruggekeer het."
Koekemoer sê die klaskamers, badkamers en alle ander geriewe is ontsmet en skoongemaak volgens voorskrifte.
"Skoonmaakpersoneel is ook opgelei sodat hulle presies weet wat gedoen moet word. Die skool het ook al die nodige reinigingsmiddels en termometers ontvang, maar moes wel spuithouers, lappe en handskoene uit eie fondse aankoop aangesien ons skoonmaakmiddels en ontsmetmiddels in grootmaat ontvang het." Hy sê dit is egter 'n klein prys om te betaal aangesien die veiligheid van die personeel en die leerders vir hulle ononderhandelbaar is. Die personeel het ook Maandag teruggekeer skool toe en is druk besig met beplanning sodat die akademie
Clifton Titus, hoof van Hoërskool Pacaltsdorp, sê alles was in plek vir hul personeel wat Maandag teruggekeer het skool toe. "Ons het 'n stasie met verskeie stappe; onderwysers kom by die agterdeur van die kantoor in, word ontsmet, temperatuur word gemeet en beweeg dan na die saal waar ons werk."
Titus sê al hul personeel, wat lede van die onderwysersunie is, het opgedaag en almal was die week besig om te werk aan die kurrikulum sodat die terugkeer van die matrikulante goed kan verloop. "Ons gaan selfs die week 'n kort video maak en op ons WhatsApp-groepe aan ouers en leerders uitstuur om te wys waar die stasies is en wat presies gedoen moet word."
Volgens Titus het hulle nog geen klagtes van ouers gehad wat hul kinders wil onttrek nie, maar daarvoor het hulle ook reeds planne wat in plek is. Hy sê ouers wat hom graag wil sien moet 'n afspraak maak, en nie net by die skool opdaag nie. "Alles moet ongelukkig nou sensitief hanteer word."
Gerhard Haupt, hoof van Olympia Vaardigheidskool, sê die personeel het van Maandag af in die eetsaal vergader. "Ons het die Standard Operational Procedures (SOP) bespreek wat die bestuurspan verlede week opgestel het. Die terreinspan het klasse skoongemaak en gras gesny. Daar word plakkate gedruk en lyne op die vloere verf vir die korrekte sosiale afstand." Verder sê Haupt het hulle en Van Kervel skool 'n gesamentlike nuusbrief opgestel.
"Dit gaan beskikbaar wees sodat die leerders dit by polisiestasies en sekere winkels kan gaan afhaal. Dit sal ook na Riversdal, Mosselbaai, Knysna en Groot-Brak geneem word." Hy sê daar is nog nie 'n datum wanneer spesiale skole begin nie.
Dawid Kamfer, die provinsiale leier van Icosa, het self Maandagoggend skole besoek.
"Die meeste skole se hekke was gesluit, met hoofde wat agter geslote deure met hulle personeel vergader het."
Hy sê hy kon darem met die hoof van Hoërskool Sao Bras gesels, alhoewel hulle nie lank kon gesels nie. "Mnr. Groenewal was baie opgewonde oor die besoek en het gesê hy waardeer dit baie."
Kamfer sê Icosa wil elke opvoeder sterkte toewens in hierdie moeilike tyd.
Lees ook, Groep staan 83 000 sterk teen opening van skole op bladsy 15.