Koronavirus rol terwyl rolbalklubs stol
Terwyl die koronavirus voortrol, sal rolbalklubs landwyd gesluit bly. Dis die uitdruklike opdrag van Rolbal Suid-Afrika (RSA) nadat verskeie van sy lede, waaronder Eden-rolbal, vertoë gerig het dat klubs hul sport op kleiner skaal net op klubvlak kan beoefen.
RSA, wat ook sterk onder die juk van die regering gebuk gaan, sê rolbal, in enige vorm, is taboe tydens die grendeltyd. Geen rolbal sal op klubvlak toegelaat word nie en nog minder mag individuele spelers op hul eie oefen.
Tys Pringle, mediawoordvoerder van die George-rolbalklub, sê hulle het Eden-rolbalbestuur gevra om RSA te nader met 'n versoek om klubaktiwiteite op beperkte vlak toe te laat. Die motivering hiervoor is dat rolbal, net soos tennis en gholf, nie 'n kontaksport is nie. "Dit maak rolbal dus aantrekliker en minder riskant as die ander sogenaamde kontaksportsoorte."
Hy sê alle veiligheidsmaatreëls, soos die dra van maskers en die nakoming van veiligheidsafstande van 2 m, kan maklik op 'n rolbalperk gehandhaaf word.
"Om getalle tot 50 spelers te beperk, is eweneens maklik haalbaar. Die George-rolbalklub is, soos die meeste ander klubs, heeltemal by magte en goed toegerus om enige inperkingsmaatreëls toe te pas en te beheer.
“Ons kan selfs die verbod op die verkoop van drank met gemak toepas deur ons klubkroeg gesluit te hou. Enige fisieke kontak kan vermy word, selfs die skud van hande voor en na 'n wedstryd kan verbied word.” Pringle sê die fisieke, geestelike en verstandelike oefening wat rolbal veral aan die meer senior deelnemers bied, is van die uiterste belang, selfs lewensbelang, vir die handhawing van 'n gesonde liggaam en geestelike ingesteldheid wat in hierdie dae van inperking en eensaamheid in menige geval sy tol eis.
"Die koronavirus-inperking is 'n traumatiese ervaring vir die meeste rolbalspelers wat daaraan gewoond was om vir twee, drie keer 'n week 'n paar balle te rol.
“Vir baie was dit hul enigste buitenshuise oefening en blootstelling en hulle sal nou hul geestesgesondheid móét verander.
“Om nou skielik nie uit te kom om te oefen en interaksie met jou klubmaats te hê nie, kan erg traumaties wees. Die isolasie veroorsaak angs en depressie en nie almal kan dit positief hanteer nie.”
Pringle sê al hoe meer rolbalspelers, soos trouens ook die geval is met ander sportmanne en -vroue wat aan ander sportsoorte deelneem, raak gefrustreerd en kriewelrig oor die onversetlike houding waardeur alle sport-, sosiale bedrywighede en kontak aan bande gelê word. "Indien skole en ander instansies oopgestel mag word, selfs met sekere beperkings en voorwaardes, dan ontstaan die vraag waarom kan sportsoorte soos rolbal, tennis en gholf, wat nie kontaksportsoorte is nie, nie ook oopgestel word nie. Daar is immers meer voor- as nadele daaraan verbonde."
Na verneem word het RSA wel vertoë aan die regering gerig, sê Pringle, maar hulle was nie optimisties dat daar aan hul versoeke voldoen sal word nie.
Rolbal bly nou een sportsoort wat jy nie in jou eie tuin of in die huis kan beoefen nie.