Matrikulante hou angstig asem op vir maskerbal
Minstens een skool het reeds sy matriekafskeid gekanselleer as gevolg van die onsekerheid oor Covid-19, terwyl dit by ander skole in die weegskaal is.
Die jaarlikse glansgeleenthede by skole is iets waarna matrieks lank uitsien en geen moeite word ontsien om dit 'n onvergeetlike aand te maak nie. Maar hierdie jaar sal 'n maskerbal beslis voorkeur geniet.
Derick Petersen, hoof van Parkdene Sekondêr,
sê die skool het nog nie 'n finale besluit oor die matriekafskeid geneem nie. Dit sal afhang van insette van byvoorbeeld die skoolbeheerliggaam, die ouers, die opvoeders en die leerders. "As die ouers nee sê sal dit nie aangebied word nie."
Volgens Titus is alle toere, sportaktiwiteite en partytjies vir eers op halt gesit.
Mbuyiseni Edward Mgxaka, hoof van Hoërskool Thembalethu, het gesê in die stadium is hulle nie seker of dit wel aangebied gaan word nie. Dit is veronderstel om in Junie plaas te vind. Dit sal waarskynlik nie plaasvind nie.
Kobus Koekemoer, waarnemende hoof van Hoër Tegniese Skool Eden (HTS Eden), het gesê geen besluit is nog geneem nie. Daar is beperkinge op die bymekaarkom van mense en die skool is uitgelewer aan instansies waar dit gewoonlik gehou word.
Adolf Gouws, hoof van Hoërskool Punt op Mosselbaai, het gesê die skool het sy matriekafskeid vir Augustus beplan, maar dit sal nie realiseer nie. Hy het benadruk dat dit beslis nie van die baan is nie.
Die vraag is net wanneer? "Sodra ons dit kan hou, sal ons dit hou - al is dit in Desember."
Stephanus Potgieter, hoof van Langenhoven Gimnasium op Oudtshoorn, het gesê ook by dié skool is geen finale besluit nog geneem nie.
Dit is wel deur die skool se bestuurspan bespreek. Hy het die hoop uitgespreek dat daar nog verligtingsmaatreëls sal wees sodat dit wel aangebied kan word.
Die leerlinge sien elke jaar baie daarna uit. Dit raak nie net die gr.12-leerlinge nie, maar ook die gr.11's want dit bied vir hulle moontlikhede om hul leierskapvaardighede te wys met die organisering daarvan.
Vivian Prins, hoof van Kairos Senior Sekondêr op Heidelberg, het gesê by die skool sou dit op 3 April gehou word, maar is uitgestel. In die stadium is daar geen duidelikheid nie. "Ons sal kyk wat gebeur met die inperking en of byeenkomste gehou kan word."
André Latsky, hoof van Hoër Landbouskool Oakdale Riversdal, het gesê alles sal afhang van die vlak van inperking. "As dit beweeg na vlak 1, sal dit aangebied word. Al is dit net voor die matriekeksamen. Indien moontlik sal ons dit graag vir die gr.12's wil aanbied. Hulle het sover nie 'n baie aangename jaar gehad nie."
Christo Vorster, hoof van Hoërskool Outeniqua in George, het gesê dis te vroeg om uitsluitsel te gee. "In die stadium word alle sosiale byeenkomste deur die staat verbied.
Dis prematuur om nou te spekuleer of dit aangebied gaan word al dan nie. Ons sal dit egter graag wil aanbied."