Huiswerkers: dís wat jy moet weet

Huiswerkers kon sedert Maandag 1 Junie weer terugkeer na hul werksplekke. Maar, terwyl die wêreld teen Covid-19 veg, wat is in die beste belang vir jou én jou huiswerker?

Professor Shaheen Mehtar van die Afrikainfeksiebeheernetwerk sê weens die hoë aansteeklikheid van die virus, is dit steeds beter om onnodige kontak met mense te vermy. Huiswerkers staar egter finansiële onsekerheid in die gesig en meeste is gretig om weer te werk.

Vervoer

Sommige huiswerkers woon in en is dus reeds op hul werksperseel, maar baie huiswerkers moet na en van hulle woning na die werksplek reis. Verbruikers van openbare vervoer word aangemoedig om dit met oorleg te gebruik.

Higiëne

Dit is belangrik om met jou huiswerker te gesels en seker te maak dat sy of hy oor die nodige handreiniger en 'n gesigmasker beskik. Praat ook oor persoonlike higiëne en om sosiale afstand te handhaaf. As werkgewer kan jy ook self jou huiswerker vervoer of tydelik laat inwoon.

Die Wet op Basiese Diensvoorwaardes vereis dat jy jou huiswerker siekteverlof moet betaal wanneer hy of sy siek is. Dit is nou ook 'n goeie tyd om jou huiswerker vir werkloosheidsversekering te registreer.

Dit is die werkgewer se verantwoordelikheid om toe te sien dat die werksomgewing skoon is en dat daar genoeg geriewe is sodat almal in die huishouding gereeld hul hande kan was, 'n sosiale afstand kan hou, en persoonlike higiëne nagekom kan word.

Ooreenkoms

Die algehele sekretaris van die SuidAfrikaanse Huishoudelike diens- en geallieerde werkersunie, Myrtle Witbooi, doen 'n beroep op werkgewers om steeds hul huiswerkers te vergoed, al word daar ooreengekom dat daar nie tydens die Covid19-tydperk gewerk word nie.