Afrikaans is my taal
Ben Erasmus, Mosselbaai:
Vir die afgelope 20 jaar wat ek hier in die gebied woon, het iets wat ek opgemerk het tot ‘n enorme grief in my binneste ontwikkel.
Dit is die miskenning van ons Afrikaanse taal.
As ons om ons rondkyk is al wat ’n besigheid se naam in Engels terwyl die mense wat daar werk skaars behoorlik Engels kan praat.
Kyk maar op besighede se geboue en hul trokke, trokkies en paneelwaens.
Kyk maar na die produkaanduiding tussen supermarkte se rakke en hulle advertensiebiljette.
Verder sal ek seker nie ver uit wees as ek sê dat seker 90% van ons inwoners in die gebied Afrikaanssprekend is nie.
Dan is ons ook nog in ATKV-wêreld.
Saam met Langenhoven wil ek sê: “Engels, Engels net wat jy sien (en hoor), en so word my moedertaal vermoor.”
Alleen kan ek nie veel daaraan doen nie, maar het my voorgeneem om nooit weer by ‘n supermark iets te koop waar die produkaanduiding tussen die rakke nie ook in Afrikaans is nie. Vir ’n geruime tyd al ontvang ek geen dokumente wat net in Engels is nie. Ek stuur dit terug en vra vir ‘n Afrikaanse een.
Onlangs het ek ‘n persoon wat my ‘n kwotasie moes gee vir ‘n onderhoudstaak aan my huis laat omdraai omdat alles op sy paneelwa in Engels was.
Ek wil ook my dank uitspreek teenoor besighede met Afrikaanse name.
Ek vertrou dat u die ondersteuning van die Afrikaanse gemeenskap sal ervaar.
U kan my nou maar name noem, maar ek is hipersensitief oor hierdie blatante miskenning van Afrikaans en ek maak geen geheim daarvan nie.