Hengelaars lees tussen die lyne
Suid-Kaapse hengelaars sal nog 'n rukkie moet wag alvorens hulle weer lyne kan natmaak.
Daar heers steeds grootskeepse onduidelikheid oor die sportregulasies vir vlak 3, veral wat hengel betref.
Die minister van omgewingsake, bosbou en visserye, Barbara Creecy, het Maandag 1 Junie aangekondig dat hengel vir ontspanning ingevolge die regering se inperkingsvlak 3 wel toegelaat sal word - 'n besluit wat deur die Demokratiese Alliansie verwelkom is, maar dis onderhewig aan die publisering van nuwe hengelregulasies in die Staatskoerant.
Baie sportfederasies sit egter met meer vrae as antwoorde en wag in spanning om te sien wanneer die nuutste regulasies in die Staatskoerant gepubliseer sal word. Dit word dié week verwag, maar moenie asem ophou nie. Hopelik sal dit meer duidelikheid gee oor wat sekere sportlui kan en mag doen.
Banie Vermeulen, mediawoordvoerder van die Eden-hengelvereniging, het aan George Herald gesê hulle soek ook dringend antwoorde oor wanneer en waar hengelaars die grotes kan inkatrol. "Ons hande is afgekap en ons kan geen hengelnuus aan ons lede deurgee voordat die nuutste regulasies eers in die Staatskoerant aangekondig word nie.
"Strande bly steeds toe, aldus die sportminister. Dus kan hengelaars nie van die strande af of op rotse gaan hengel nie. Eweneens kan hengelaars nie op die see uitgaan met huurbote nie. Dis taboe."
Verskeie gerugte is in omloop, veral op sosiale media, dat hengelaars wel in damme en in riviere mag woeker. Maar, sê Vermeulen, dis alles hoorsê en hengelaars doen dit op eie risiko. "'n Stywe boete is jou voorland as jy gevang word. Ons wag maar op die minister om meer duidelikheid te gee wat hengelaars, wat die sport vir ontspanning beoefen, te doen staan. Weereens wag ons op antwoorde in die Staatskoerant."
Hennie Kleyn, eienaar van Extreme
Fishing in George, stem saam. "Die antwoorde lê opgesluit in die Staatskoerant en wat die sportminister besluit. Ek kry die vissers jammer wat moet visvang om 'n bestaan te maak. Hulle is nou uitgelewer aan besluitnemers met min of geen begrip van wat op grondvlak aangaan nie. Intussen verkoop ek fluks aas."
En die blinklywe swem vry rond.