DA verras met Farrel en Adams
Die DA het verras met sy keuses vir 'n proporsionele stadsraadslid in George en die kandidaat vir 'n wyk in 'n munisipale tussenverkiesing.
Dr. Dennis Farrell, voorsitter van die George-sakekamer, betree die politiek en Brendan Adams, bekende gemeenskapsleier sal die DA se vaandel dra in die munisipale tussenverkiesing in wyk 17. Beide het sterk gemeenskapsbande. Die tussenverkiesing sal moontlik in Augustus plaasvind en die wyk sluit Conville en Rosemoor in.
Geordin Hill-Lewis, LP en mede DA-kiesafdelingshoof, het die nuus vroeg Dinsdagmiddag in 'n verklaring bekendgemaak. Luidens die verklaring is Farrell genomineer om die vakante proporsionele setel in die raad te vul.
Hy is beskryf as 'n sakeleier met wye ervaring van die sakewêreld wat menslike hulpbronnebestuur en die bestuur van 'n eie sakeonderneming insluit.
Kort nadat die nuus bekend geword het, het Farrell (63) gesê dit gaan nie daaroor om die politiek te betree nie. "Dit gaan oor of ek 'n verskil kan maak en die bydrae wat ek kan lewer tot die breër samelewing."
Op die vraag hoekom die DA, het hy geantwoord: "Ek assosieer my met hul waardes."
Hill-Lewis het gesê Adams is 'n gemeenskapsleier van uitnemendheid. Hy het voorheen diens gedoen as 'n brandbestryder in die voorste linies teen van die ergste brande die laaste dekade. Hy is ook 'n tradisionele leier (stamhoof) in die Khoi-gemeenskap. Baie mense ken Adams ook vir sy betrokkenheid by 'n blad op sosiale media, Lokasies Staan Saam.
NA BLADSY 5